ބޭންކް އޮފް މޯލްޑިވްސް (ބީއެމްއެލް) އިން އަލަށް ތައާރަފުކުރާ ޑިޖިޓަލް ވޮލެޓް "ސްވައިޕް" ގެ ލިމިޓެޑް ރިލީޒްއަށް ރެޖިސްޓްރޭޝަން މިއަދު ހުޅުވާލައިފި އެވެ. މިއީ ރާއްޖެއާއި ރާއްޖޭން ބޭރަށް ފަސޭހަކަމާއެކު ފައިސާގެ މުއާމަލާތްތައް ކުރެވޭ ގޮތަށް ފަރުމާކޮށްފައިވާ، ސައްތަ އިން ސައްތަ ދިވެހި އުފެއްދުމެކެވެ.

ބީއެމްއެލް އިން މައުލޫމާތު ދީފައިވާ ގޮތުގައި، މި ލިމިޓެޑް ރިލީޒްގައި ސްވައިޕް ބޭނުންކުރުމުގެ ފުރުސަތު ލިބޭނީ "swipe.mv" ވެބްސައިޓް މެދުވެރިކޮށް ރަޖިސްޓަރވާ ފުރަތަމަ 5،000 ކަސްޓަމަރުންނަށެވެ. މިއީ މި އާ އުފެއްދުން ތަޖުރިބާކޮށްލުމަށް އާންމުންނަށް ލިބޭ ހާއްސަ ފުރުސަތެކެވެ.

ރަޖިސްޓްރީވާ ކަސްޓަމަރުންނަށް ސްވައިޕްގެ ގިނަ ފީޗާތަކެއް ބޭނުންކުރުމުގެ ފުރުސަތު ލިބިގެންދާނެ އެވެ. އޭގެ ތެރޭގައި ޕާސަން-ޓު-ޕާސަން ޓްރާންސްފާ ތަކާއި، ކިއުއާރް ކޯޑް މެދުވެރިކޮށް ކުރެވޭ ފައިސާގެ މުއާމަލާތްތައް ހިމެނެ އެވެ. މީގެ އިތުރުން، ސްވައިޕް މެދުވެރިކޮށް ކުރާ ހޭދަތަކުގެ އިންސައިޓްސް ބަލައިލުމާއި، ޕޭމަންޓް ލިންކް ފޮނުވައިގެން ފައިސާ ހޯދުމުގެ ފަސޭހަކަން ވެސް ލިބިގެންދާނެ އެވެ.

މި ވޮލެޓަކީ މަލްޓި-ކަރަންސީ ވޮލެޓެއްގެ ގޮތުގައި ބޭނުންކުރެވޭނެ އެއްޗެކެވެ. ވޮލެޓް ޓޮޕްއަޕް ކުރުމަށް ބީއެމްއެލް އެކައުންޓްތަކުގެ އިތުރުން ކޮންމެ ބޭންކެއްގެ ކްރެޑިޓް އަދި ޑެބިޓް ކާޑެއް ވެސް ބޭނުންކުރެވޭނެ އެވެ. އަދި ވޮލެޓްގައި ހުންނަ ފައިސާ އަނބުރާ ބީއެމްއެލް އެކައުންޓަށް ފޮނުވުމުގެ ފުރުސަތުވެސް ކަސްޓަމަރުންނަށް އޮންނާނެ އެވެ.

ބީއެމްއެލް އިން ބުނީ ސްވައިޕް ފަރުމާކޮށްފައިވަނީ ރާއްޖޭގެ ރެގިއުލޭޓަރީ މިންގަނޑުތަކާއި ބައިނަލްއަގުވާމީ ޕޭމަންޓް ސްޓޭންޑާޑްތަކާ އެއްގޮތަށް ކަމަށެވެ. މިއީ ރާއްޖޭގެ މާލީ ދާއިރާއަށް ގެނެވޭ މުހިންމު ކުރިއެރުމެއްގެ ގޮތުގައި ބޭންކުން ފާހަގަކުރެ އެވެ.