އެމެރިކާ އިން އަލަށް އުފެއްދި “ބޯޑް އޮފް ޕީސް” އާއި ގުޅެން ބޭނުންވާ ކަމަށާއި ޣައްޒާގައި ޞުލްޙަ ޤާއިމް ކުރުމަށާއި ޣައްޒާ އަލުން ބިނާކުރުމުގެ މަސައްކަތްތަކުގައި ޙިއްޞާ ވުމަށް 15 ޓްރިލިއަން ރުޕިއާ އެމެރިކާ އާއި ޙަވާލު ކުރާނެ ކަމަށް އިންޑޮނޭޝިއާގެ ރައީސް ޕްރަބޯވޯ ސުބިއަންޓޯ ވިދާޅުވެއްޖެއެވެ.
ރައީސް ޕްރަބޯވޯ މިހެން ވިދާޅުވީ ޕާލަމެންޓުން އެކަމުގައި ގޮތެއް ނިންމުމުގެ ކުރިން އެ ބޯޑުގައި ބައިވެރިވުމަށް ޝައުގުވެރިކަން ފާޅުކުރައްވައި، އަދި މި މަހުގެ 22 ވަނަ ދުވަހު ސްޕިޒަލޭންޑުގައި އޮތް އެ ބޯޑުގެ އިފްތިތާޙީ ޖަލްސާގައި ބައިވެރިވެފައި ވާތީވެ، އެކަމާއި ގުޅިގެން އިދިކޮޅު ޕާޓީތަކުން އޭނާ އަށް ފާޑު ކިޔަން ފެށުމުންނެވެ.
އިދިކޮޅުން ބުނަނީ ޓްރަމްޕުގެ އަމިއްލަ މަސްލަޙަތަކަށް ކުރަމުންދާ މަސައްކަތެއްގައި އިންޑޮނޭޝިއާގެ ރައީސުގެ ޙައިސިއްޔަތުން ރަނގަޅަށް ދިރާސާ ނުކޮށް އެ ބޯޑުގައި ބައިވެރި ވުމަކީ ޚާރިޖީ ސިޔާސަތަށް ގޮންޖެހުންތަކެއް ކުރިމަތިވެދާނެ ކަމެއް ކަމަށެވެ. ޚާއްޞަކޮށް ޕާލަމެންޓުން ތަސްދީގު ކުރުމުގެ ކުރިން ބޯޑުގެ ޗާޓަރުގައި ސޮއިކުރުމަކީ އިންޑޮނޭޝިއާގެ ޑިޕްލޮމެޓިކް ގުޅުންތަކަށް ހުރަސްއެޅި، ދުސްތޫރީ ކަންބޮޑުވުންތައް އުފެދިދާނެ ކަމެއް ކަމަށް އިދިކޮޅުން ބުނެއެވެ.
Advertisement
އިންޑޮނޭޝިއާ އިން ޕީސް ބޯޑުގައި އަދި ސޮއި ނުކުރެއެވެ. ނަމަވެސް އެ ޤައުމުން ދަނީ ހިލޭސާބަހަށް އެ ބޯޑުގެ މަސައްކަތްތަކުގައި އެހީ ފޯރުކޮށްދެމުންނެވެ.
