ސެމްސަންގް ކުންފުނީގެ އެންމެ ފަހުގެ ފްލެގްޝިޕް ފޯނު ސީރީޒް ކަމަށްވާ ގެލެކްސީ S26 އަންނަ ފެބްރުއަރީ މަހުގެ 25 ވަނަ ދުވަހު ބާޒާރަށް ނެރޭނެ ކަމަށް ބެލެވޭ ރިޕޯޓްތަކެއް ފެންމަތިވެއްޖެ އެވެ.
މި އާ ފޯނުތަކާ ގުޅޭގޮތުން ލީކުވެފައިވާ މައުލޫމާތުތަކަށް ބަލާއިރު، މިފަހަރުގެ އެންމެ ފާހަގަކޮށްލެވޭ އެއް ބަދަލަކީ ފޯނުތަކުގެ ބޭސް ސްޓޯރޭޖް ނުވަތަ އެންމެ ކުޑަ ސްޓޯރޭޖްގެ ގޮތުގައި 256GB ހަމަޖެއްސުމެވެ. މިއީ ކުރީގެ މޮޑެލްތަކުގައި ބޭނުންކުރަމުން އައި 128GB އާ އަޅާބަލާއިރު ލިބޭ ބޮޑު ކުރިއެރުމެކެވެ.
ނަމަވެސް، ސްޓޯރޭޖް އިތުރުވުމާއެކު ފޯނުގެ އަގުތަކަށް ބަދަލުތަކެއް އަންނާނެ ކަމަށް ބެލެވެއެވެ. އެގޮތުން ޔޫރަޕްގެ ބައެއް މާކެޓްތަކުގައި އާދައިގެ S26 މޮޑެލްގެ އަގު S25 އަށްވުރެ 200 ޔޫރޯ އަށްވުރެ ބޮޑުވާނެ ކަމަށް ރިޕޯޓްތަކުން ބުނެއެވެ.
ރިޕޯޓުތައް ބުނާގޮތުން ގެލެކްސީ S26 ޕްލަސް މޮޑެލްގެ އަގަށް ބޮޑު ބަދަލެއް ނާންނާނެ އެވެ. ނަމަވެސް، S26 އަލްޓްރާގެ އަގު ޔޫރަޕްގެ ބައެއް ގައުމުތަކުގައި S25 އަށްވުރެ 100 ޔޫރޯ އަށްވުރެ ހެޔޮވުމަކީ އެކަށީގެންވާ ކަމެކެވެ،
އެމެރިކާގެ މާކެޓުގައި މި ސީރީޒްގެ ފޯނުތަކުގެ އަގު އުޅޭނީ 800 ޑޮލަރާއި 1,300 ޑޮލަރާ ދެމެދުގަ އެވެ. ދެކުނު ކޮރެއާގައިވެސް އަގުތަކަށް ކުޑަ ބަދަލެއް އަންނާނެ ކަމަށް ދައްކާއިރު، އިންޑިއާ ފަދަ ބޮޑެތި މާކެޓްތަކަށް އަންނާނެ ބަދަލުތަކެއް އަދި މުޅިން ސާފެއް ނުވެ އެވެ.
މީގެ އިތުރުން، ސެމްސަންގުން މީގެ ކުރިން ދެމުން އައި 'ފްރީ ސްޓޯރޭޖް އަޕްގްރޭޑް' އޮފާ މިފަހަރު ނުލިބުމަކީ އެކަށީގެންވާ ކަމެއް ކަމަށްވެސް ޓެކްނޮލޮޖީ ދާއިރާގެ ހަބަރުތައް ބުނެއެވެ.
މި ފޯނުތަކާ ގުޅޭ ރަސްމީ މައުލޫމާތު ސެމްސަންގުން ހާމަކުރާނީ ފެބްރުއަރީ މަހު ބާއްވާ ހާއްސަ އިވެންޓެއްގަ އެވެ. ސްޓޯރޭޖް ބޮޑުވުމަކީ ގިނަ ބަޔަކު އިންތިޒާރު ކުރަމުން އައި ބަދަލަކަށް ވީނަމަވެސް، އަގަށް އަންނަ ބަދަލުތަކާ މެދު ކަސްޓަމަރުންގެ މެދުގައި ވަނީ ބަހުސް އުފެދިފަ އެވެ.
