ފޯނު މާކެޓުގައި ވާދަވެރިކަން އިތުރުވަމުންދާ މި ޒަމާނުގައި ދެކުނު ކޮރެއާގެ ދުނިޔިއިން މަޝްހޫރުކަން ހޯދާފައިވާ ސެމްސަންގް އިން އެ ކުންފުނީގެ ފުރަތަމަ ތިންފަށްކޮށްލެވޭ ފޯނު "ގެލެކްސީ ޒީ ޓްރައިފޯލްޑް" ރަސްމީކޮށް ދައްކާލައިފި އެވެ. މި ފޯނަކީ ފޯނު ބޭނުންކުރާ މީހުންނަށް އައު ތަޖުރިބާއެއް ކޮށްލުމުގެ މަގުސަދުގައި ނެރެފައިވާ ފަހުގެ ޓެކްނޮލޮޖީގެ ފޯނެކެވެ.

ސްމާޓް ފޯނު އުފައްދާ ކުންފުނިތަކުގެ މެދުގައި ފަށްޖެހޭ ފޯނުގެ ވާދަވެރިކަން މިހާރު ބޮޑުވެފައިވާއިރު، ސެމްސަންގުން މީގެ ކުރިން ވަނީ ދެ ޑިސްޕްލޭ އެކުލެވޭ ފޯނެއް ނެރެފަ އެވެ.

އަލަށް ތައާރަފްކުރި "ގެލެކްސީ ޒީ ޓްރައިފޯލްޑް" އާއެކު ސެމްސަންގް އަކީ މިފަދަ ފޯނެއް އުފައްދާ މާކެޓަށް ނެރުނު ފުރަތަމަ ކުންފުންޏެވެ. އެހެން ކަމުން މިއީ ސްމާޓް ފޯނު މާކެޓަށް ސެމްސަންގުން ނެރުނު އާ އީޖާދެކެވެ.

މުޅި ފޯނު އެއްކޮށް ހުޅުވައިލުމުން، ޑިސްޕްލޭގެ ބޮޑުމިނުގައި 10 އިންޗި (253.1 މިލިމީޓަރު) ހުންނާނެ އެވެ. މިއީ ސެމްސަންގުގެ އެންމެ ފަހުގެ ފޯލްޑަބަލް ފޯނު "ގެލެކްސީ ޒީ ފޯލްޑް 7" އަށް ވުރެ 25 ޕަސެންޓު ބޮޑު ޑިސްޕްލޭއެކެވެ. ނަމަވެސް، ފޯނު އެއްކޮށް ފަށްޖަހާލުމުން، ޖީބަށް އެންމެ ހެޔޮވަރު ސައިޒަކަށް ބަދަލުވެ އެވެ. މި ފޯނުގެ ބޯމިނަކީ 3.9 މިލިމީޓަރެވެ. މިއީ ސެމްސަންގުން ކުރިން ނެރެފައިވާ ފޯނުތަކާ އަޅާބަލާއިރު، އެ ކުންފުނީގެ އެންމެ ތުނި ފޯނެވެ. ބަރުދަނުގައި 309 ގްރާމް ހުންނަ މި ފޯނަކީ، އެ ކުންފުނީގެ އެންމެ ވަރުގަދަ ބެޓެރި ވެސް އެކުލެވޭ ފޯނެކެވެ. 30 މިނިޓު ތެރޭގައި ސުޕަ ފާސްޓް ޗާޖިންއާއެކު ބެޓެރީގެ 50 ޕަސެންޓު ޗާޖު ކޮށްލެވޭނެ އެވެ. މި ފޯނުގެ ކުލަ އަކީ "ކްރާފްޓެޑް ބްލެކް" އެވެ.

_{މިއީ އެ ކުންފުނިން މިހާތަނަށް ނެރޭ އެންމެ ތުނި ފޯނު.}

މި ފޯނުގައި 16 ޖީބީ ރެމް އެއް އެކުލެވޭ އިރު ސްޓޯރޭޖުގައި 512 ޖީބީ އަދި 1 ޓީބީގެ ފޯނު ހުންނާނެ އެވެ. ތިން ކެމެރާ އެކުލެވޭ މި ފޯނުގައި 200 މެގަ ޕިކްސަލްގެ މެއިން ކެމެރާއެއްގެ އިތުރުން 10 މެގަ ޕިކްސަލްގެ ޓެލެފޮޓޯ ކެމެރާއަކާއި، 12 މެގަ ޕިކްސަލްގެ އަލްޓްރާ ވައިޑް ކެމެރާއެއް އެކުލެވެ އެވެ. އަދި ފްރަންޓުގައި 10 މެގަ ޕިކްސަލްގެ ކެމެރާއެއް ހުންނާނެ އެވެ.

ސެމްސަންގުން ބުނި ގޮތުގައި މި ފޯނު ހާއްސަކޮށްފައިވަނީ މިފަދަ ފޯނުތަކަށް ޝައުގުވެރިވާ ކަސްޓަމަރުންނަށެވެ. ސްމާޓްފޯނު މާކެޓުގައި ޗައިނާގެ ވާވޭ އާއި އެޕަލް ފަދަ ބޮޑެތި ކުންފުނިތަކުން ވެސް މިފަދަ ފަށްޖެހޭ ފޯނުތަކެއް ނެރެން ތައްޔާރުވަމުން އަންނައިރު، ސެމްސަންގުން މި ފޯނު ނެރުމުގެ މަގުސަދަކީ، މި ވާދަވެރި މާކެޓުގައި އެ ކުންފުނި ކުރިއެރުވުމަށެވެ. ނަމަވެސް އެނަލިސްޓުން ބުނާ ގޮތުގައި މިފަދަ ފޯނުތަކުގެ އަގު ބޮޑުވުމާއި އުފެއްދުމުގެ ގޮންޖެހުންތަކާ ހެދި، ފަށްޖެހޭ ފޯނުތަކަށް މިވަގުތު ޑިމާންޑު ދަށެވެ.

މި މަހުގެ 12 އިން ފެށިގެން މި ފޯނު ބައެއް މާކެޓްތަކުގައި ވިއްކަން ފަށާނެ އެވެ. އެގޮތުން އެންމެ ފުރަތަމަ ވިއްކަން ހަމަޖެހިފައި ވަނީ ދެކުނު ކޮރެއާ، ޗައިނާ، ސިންގަޕޫރު، ޓައިވާން، ޔޫއޭއީ އަދި އެމެރިކާގައެވެ. "ގެލެކްސީ ޒީ ޓްރައިފޯލްޑް" ގެ އަގުތައް އުޅޭނީ ގާތްގަނޑަކަށް 2،500 އެމެރިކާ ޑޮލަރަށެވެ.