ދުނިޔޭގެ މަގުބޫލުކަން ހޯދާފައިވާ ކޮމެޑީ އެކްޓްރެސް ކެތުރިން އޯހާރާ އުމުރުން 71 އަހަރުގައި މަރުވެއްޖެ އެވެ. އޭނާ މަރުވިކަން އާއިލާއާ ހަވާލާދީ ބައިނަލްއަގުވާމީ މީޑިއާތަކުން ވަނީ ކަށަވަރުކޮށްދީފައެވެ.
ކެނެޑާއަށް އުފަން ކެތުރިން އޯހާރާ އަކީ ފާއިތުވި ދިހަވަރަކަށް އަހަރު ތެރޭގައި ފިލްމީ ދާއިރާގައި ފާހަގަކޮށްލެވޭ ފަދަ ބޮޑު ކާމިޔާބީތަކެއް ހޯދާފައިވާ ފަންނާނެކެވެ. އޭނާ އެންމެ ބޮޑަށް މަޝްހޫރުވެފައިވަނީ "ހޯމް އެލޯން" ފިލްމުގައި ކެވިން މެކްލިސްޓާގެ މަންމަ، ކޭޓް މެކްލިސްޓާގެ ރޯލުންނެވެ. މީގެ އިތުރުން "ޝިޓްސް ކްރީކް" ސީރީޒްގައި އޭނާ ކުޅެފައިވާ މޮއިރާ ރޯޒްގެ ކެރެކްޓާއަކީ ގިނަ ބައެއްގެ މަގުބޫލުކަން ލިބި، އޭނާއަށް އެމީ އެވޯޑް ވެސް ހޯދައިދިން ރޯލެކެވެ.
އޯހާރާގެ ކެރިއަރު ފެށިގެން އައީ 1970 ގެ އަހަރުތަކުގައި "ސެކަންޑް ސިޓީ ޓީވީ" އިންނެވެ. އޭނާ ވަނީ "ބީޓްލްޖޫސް" ފަދަ ކާމިޔާބު އެތައް ފިލްމުތަކެއްގައި މުހިންމު ރޯލުތަކެއް އަދާކޮށްފަ އެވެ. އޭނާގެ ހުނަރުވެރިކަމާއި، ވަކިން ހާއްސަކޮށް ކޮމެޑީ ދާއިރާގައި އޭނާ ދައްކުވައިދީފައިވާ ތަފާތު ހުނަރުތަކުގެ ސަބަބުން އޭނާއަކީ ހޮލީވުޑްގެ އެންމެ އިހުތިރާމް ލިބިގެންވާ އެއް ފަންނާނެވެ.
Advertisement
އޭނާ މަރުވުމާ ގުޅިގެން ފިލްމީ ދާއިރާގެ ގިނަ އަދަދެއްގެ ފަންނާނުންނާއި އޭނާގެ ފޭނުން ދަނީ ސޯޝަލް މީޑިއާގައި ހިތާމަ ފާޅުކުރަމުންނެވެ. ގިނަ ބަޔަކު ފާހަގަކުރާ ގޮތުގައި އޯހާރާގެ ވަކިވުމަކީ މުނިފޫހިފިލުވުމުގެ ދާއިރާއަށް، ވަކިން ހާއްސަކޮށް ކޮމެޑީ ދާއިރާއަށް ލިބުނު ފޫނުބެއްދޭނެ ބޮޑު ގެއްލުމެކެވެ.
ކެތުރިން އޯހާރާ މަރުވިއިރު އާއިލާގެ މެންބަރުން ގާތުގައި ތިބި ކަމަށް މައުލޫމާތު ލިބެއެވެ.
