މާލެ ސިޓީ ކައުންސިލުން ރޯދަ މަހާއި ދިމާކޮށް މާލޭ ސިޓީ ގޭގެގައި ހުރި ގިނަދުވަސްވެ ބާވެފައިވާ މުސްހަފްތަކާއި، ގުރުއާނުގެ އާޔަތް ނުވަތަ ހަދީސް ހިމެނޭ ދީނީ ފޮތްތަކާއި ލިޔުންތައް ނައްތާލުމަށް ސިޓީ ކައުންސިލާ ހަވާލު ކުރުމުގެ މުއްދަތު އިތުރުކޮށްފި އެވެ.

މިފަދަ ފޮތްތަކާއި ލިޔުންތައް ނައްތާލުމަށް ސިޓީ ކައުންސިލާ ހަވާލުކުރުމުގެ ފުުރުސަތު ކުރިން ހުޅުވާލާފައި އޮތީ މިދިޔަ ބުރާސްފަތި ދުވަހާ ހަމައަށެވެ. ނަމަވެސް މާލޭ ސިޓީ އެ ފުރުސަތު މާދަމާއިން ފެށިގެން އަންނަ ބުރާސްފަތި ދުވަހާ ހަމައަށް މިހާރު އިތުރުކޮށްފައިވާ ކަމަށް ސިޓީ ކައުންސިލުން ވަނީ ބުނެފަ އެވެ.

މި ތަކެތި ބަލައިގަތުން އޮންނާނީ ކޮންމެ ދުވަހެއްގެ ހެނދުނު 09:00 އިން ފެށިގެން މެންދުރު 12:00 އާއި ހަމައަށް، އަދި މެންދުރު ފަހު 13:00 އިން ފެށިގެން ހަވީރު 17:00 އާއި ހަމައަށެވެ.

ތަކެތި ބަލައިގަންނަ ތަންތަން:

1. މާލެ: ސިނަމާލެ ތިނެއްގެ ގޯތިތެރެ (ގަލޮޅު މަދުރަސާ ކުރިމަތިން ބުރުޒު މަގުން ސިނަމާލެ ތިނެއްގެ ގޯތިތެރެއަށް ވަދެވޭ ގޭޓުން އެތެރެ)
2. ވިލިމާލެ: މާލޭ ސިޓީ ކައުންސިލް އިދާރާގެ ވިލިމާލެ ސެކްޝަން
3. ހުޅުމާލެ: މާލޭ ސިޓީ ކައުންސިލް އިދާރާގެ ހުޅުމާލެ އޮފީސް

މާލެ ސިޓީ ކައުންސިލުގެ އިއުލާނުގައި ބުނީ އެ އިދާރާއިން ބަލައިގަންނާނީ ގޭގެއިން ގެންނަ، ނައްތާލަން ބޭނުންވާ، ބާވެ ނުވަތަ ހަލާކުވެފައިވާ ތަކެތި އެކަނި ކަމަށެވެ. މިކަމާ ގުޅޭ ގޮތުން މައުލޫމާތު ސާފުކުރަން ބޭނުންވާ ފަރާތްތަކުން 7994565 ނަމްބަރަށް ގުޅައި މައުލޫމާތު ސާފުކުރުމަށެވެ.