މާލޭގެ ގެއެއްގެ ތެރެއިން ގިނަ އަދަދެއްގެ ކެނެބިސް ފެނުނު މައްސަލައެއްގައި އައްޑޫ ސިޓީއަށް ނިސްބަތްވާ މީހަކު 25 އަހަރަށް ޖަލަށްލުމަށާއި، 100،000 ރުފިޔާއިން ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފި އެވެ.

މި މައްސަލައިގައި ކްރިމިނަލް ކޯޓުން ހުކުމްކޮށްފައިވަނީ ސ. ހިތަދޫ، ހެޕީފިއުޗާ، މުހައްމަދު ސުއައިދު އަހުމަދުގެ މައްޗަށެވެ.

ދައުލަތުން އޭނާގެ މައްޗަށް ދެ ދައުވާއެއް އުފުލާފައިވާއިރު، މި މައްސަލައިގެ ތަފްސީލަށް ބަލާއިރު، 2023 ސެޕްޓެމްބަރު 19 ވަނަ ދުވަހުގެ ހަވީރު 16:45 އެހާކަންހާއިރު ހ. ލުމެން ގޭގެ ތިންވަނަ ފަންގިފިލާގެ އެޕާޓްމެންޓެއްގައި މަސްތުވާތަކެތީގެ ވިޔަފާރިކުރާ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބުނެވެ. މި މައުލޫމާތާ ގުޅިގެން ސުއައިދު ހައްޔަރުކޮށްފައިވަނީ ހުޅުމާލެ ފިތުރޯނުމަގު ރަށު މާރުކޭޓު ކައިރީގައި ހުއްޓާ ކޯޓު އަމުރެއްގެ ދަށުންނެވެ.

އޭނާ ހައްޔަރުކުރުމަށްފަހު، އެދުވަހުގެ ރޭ 20:09 އެހާކަންހާއިރު އޭނާ ދިރިއުޅޭ ހ. ލުމެން ގެއަށް ހާޒިރުކޮށް، އޭނާގެ ހާޒިރުގައި އެ ގޭގެ ކޮޓަރިއެއް ފާސްކުރިއިރު، އެތަނުން ޖުމްލަ 84.9128 ގްރާމް ކެނެބިސް ފެނިފައިވެ އެވެ. މި ތަކެތި ހުރީ ބިއްލޫރި ފުޅިތަކާއި، ފިލްމު ހުސްކުރި ދަޅުތަކާއި، ރަބަރު ޕެކެޓްތަކުގަ އެވެ. މީގެ އިތުރުން، މަސްތުވާތަކެތި ބަންދުކުރަން ބޭނުންކުރާ ސާމާނާއި، އޭނާގެ ދެ ޕާސްޕޯޓާއި މެޑިކަލް ލިޔެކިޔުންތައްވެސް އެ ކޮޓަރިން ފެނިފައިވާ ކަމަށް ދައުލަތުން ބުނެފައިވެ އެވެ.

ޝަރީއަތުގެ ކުރީކޮޅު ސުއައިދު މި ދައުވާތަކަށް އިންކާރުކޮށް، އެއީ އޭނާގެ އެއްޗެހި ނޫން ކަމަށް ބުނި ނަމަވެސް، ހުލާސާ ބަޔާން ހުށަހެޅުމުގެ މަރުހަލާގައި އޭނާ ވަނީ ދައުލަތާއެކު އިއުތިރާފުގެ އެއްބަސްވުމެއް ހަދާފަ އެވެ.

މި އެއްބަސްވުމުގެ ދަށުން ގާޒީ އަލީ ނަދީމް އިއްވެވި ހުކުމުގައިވަނީ:

1. ކެނެބިސް ޓްރެފިކް ކުރުމާއި ބޭނުންކުރުމުގެ ދައުވާއަށް: 12 އަހަރާއި 6 މަހުގެ ޖަލު ހުކުމެއް. ނަމަވެސް ބަންދުގައި ހޭދަކުރި މުއްދަތު އުނިކުރުމަށްފަހު، ތަންފީޒުކުރަންޖެހޭނީ 10 އަހަރާއި 1 މަހާއި 20 ދުވަހުގެ ޖަލު ހުކުމަކާއި 50،000 ރުފިޔާގެ ޖޫރިމަނާއެއް.
2. މަސްތުވާއެއްޗެއް ޓްރެފިކް ކުރުމުގެ ދައުވާއަށް: 12 އަހަރާއި 6 މަސް ދުވަހުގެ ޖަލު ހުކުމަކާއި 50،000 ރުފިޔާގެ ޖޫރިމަނާއެއް.

މި ދެ ދައުވާ އެއްކޮށްލުމުން ސުއައިދުގެ މައްޗަށް ޖުމްލަ 25 އަހަރުގެ ޖަލު ހުކުމެއް ވަނީ އައިސްފަ އެވެ. އަދި ޖޫރިމަނާގެ ގޮތުގައި ދައްކަންޖެހޭ ޖުމްލަ 100،000 ރުފިޔާ އެއް އަހަރު ދުވަހުގެ ތެރޭގައި މީރާއަށް ދެއްކުމަށް ކޯޓުން ވަނީ އަމުރުކޮށްފަ އެވެ.