ބ. އޭދަފުށީގައި ހިނގި ނުރައްކާތެރި އެކްސިޑެންޓެއްގައި އަނިޔާވި އުމުރުން ދުވަސްވީ މީހަކަށް ހޮސްޕިޓަލުގައި ފަރުވާދެމުން އަންނަނިކޮށް ނިޔާވެއްޖެ އެވެ.
މި އެކްސިޑެންޓް ހިނގާފައިވަނީ މި މަހުގެ 15 ވަނަ ދުވަހެވެ. މި ހާދިސާގައި އަނިޔާވެގެން ފަރުވާދެމުން އަންނަނިކޮށް ނިޔާވީ އަބްބޫކަރު އަބްދުﷲ، ސީސަންގެ / ބ. އޭދަފުށި އެވެ. އުމުރުން 83 އަހަރުގެ އަބޫބަކުރަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ އައިސީޔޫގައި ފަރުވާދެމުން އަންނަނިކޮށް މިއަދު ހެނދުނުގެ ވަގުތެއްގައި ވަނީ ނިޔާވެފަ އެވެ.
މި އެކްސިޑެންޓް ހިނގި ގޮތަށް ބަލާލާއިރު، މި އެކްސިޑެންޓް ހިނގީ މަޣްރިބު ނަމާދަށް ފަހު، އަސާގަނޑެއްގެ އެހީގައި އަބޫބަކުރު މަގުމަތީ ހިނގާފައި ދަނިކޮށް ދުއްވާފައި ދިޔަ ޕިކަޕެއްގައި ޖެހިގެންނެވެ. ޕިކަޕްގައި ޖެހި އޭނާއަށް ވަނީ ވަރަށް ބޮޑެތި އަނިޔާތަކެއް ލިބިފަ އެވެ. އަބޫބަކުރަށް އެންމެ ފުރުތަމަ ފަރުވާ ދިނީ ބ. އަތޮޅު ހޮސްޕިޓަލްގަ އެވެ. އެހެން ނަމަވެސް ހާލު ސީރިއަސްވެ އިތުރު ފަރުވާއަށް މާލެ ގެނައީ އެވެ.
މި އެކްސިޑެންޓް ހިނގުމާ ގުޅިގެން ޕިކަޕް ދުއްވަން ހުރި މީހާ ވަނީ ހައްޔަރުކޮށްފަ އެވެ. ޕިކަޕު ދުއްވަން ހުރީ އަބްދުﷲ ރަމީޒު، ދުނި / ބ. އޭދަފުށި އެވެ. ފުލުހުން ގެންދަނީ މި މައްސަލަ އިތުރަށް ތަހުގީގު ކުރަމުންނެވެ.
އަބޫބަކުރުގެ ޖަނާޒާގެ ކަންކަން އޮންނާނީ މިއަދު އަސުރު ނަމާދަށް ފަހު އާ ސަހަރާގަ އެވެ.
