މި ސަރުކާރުން ތައާރަފުކުރި، ރާއްޖޭގެ ފުރަތަމަ ސަސްޓެއިނަބަލް ޓައުންޝިޕް ތަރައްގީކުރުމުގެ މަޝްރޫއު ކަމަށްވާ "ޕްރޮޖެކްޓް އައިލާ" އަކީ ރާއްޖޭގެ އިގުތިސާދު ސިންދަފާތުކުރުމަށް އެޅިގެންދާ މުހިންމު ފިޔަވަޅެއް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ނ. އަތޮޅުގެ ދިގުފަރު، ދެކެނަންފަރު އަދި ކުރަމާދޫ ފަޅު ހިމެނޭ ސަރަހައްދުގައި ހިންގާ 790 މިލިއަން އެމެރިކާ ޑޮލަރުގެ މި މަޝްރޫއަކީ، ރާއްޖޭގެ "ސްޕެޝަލް އިކޮނޮމިކް ޒޯން" (އެސްއީޒެޑް)ގައި ހިންގާ ފުރަތަމަ ސަސްޓެއިނަބަލް ޓައުންޝިޕް ޕްރޮޖެކްޓެވެ. ކްރިސްޓަލް ހޯލްޑިންގްސް ޕްރައިވެޓް ލިމިޓެޑާއި ބޯޑް އޮފް އިންވެސްޓްމަންޓާ ދެމެދު ވެވުނު އިންވެސްޓްމަންޓް އެއްބަސްވުމެއްގެ ދަށުން ކުރިއަށްގެންދާ މި މަޝްރޫއުގެ އަމަލީ މަސައްކަތް މިއަދު ވަނީ ފަށާފަ އެވެ.
ޕްރޮޖެކްޓް "އައިލާ"ގެ ބިންގާ އެޅުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ސައީދު ސިފަކުރެއްވި ގޮތުގައި މި މަޝްރޫއަކީ ރައީސް ޑރ. މުއިއްޒުގެ "ވިޝަން 2040" ގެ ދަށުން ރާއްޖޭގެ އިގުތިސާދު ސިންދަފާތުކުރުމަށް އެޅިގެންދާ މުހިންމު ފިޔަވަޅެކެވެ. އަދި މިއީ ރިއަލް އެސްޓޭޓް ސިނާއަތް އިތުރަށް ފުޅާކުރުމަށްވެސް އެޅޭ ހަރުދަނާ ފިޔަވަޅެއް ކަމަށް ވިދާޅުވި އެވެ.
މިނިސްޓަރު ވިދާޅުވީ "އައިލާ" އަކީ ސަރުކާރުގެ ރެޒިޑަންސީ އިންވެސްޓްމަންޓް ޕްރޮގްރާމާ ވެސް ގުޅިފައިވާ މަޝްރޫއެއް ކަމަށެވެ. އެގޮތުން އައިލާ ޕްރޮޖެކްޓަކީ މުއްސަނދިންނަށް ރާއްޖެއަކީ އިންވެސްޓްކުރުމުގެ މުގާބިލުގައި ދިގު މުއްދަތަކަށް އައިސް ހުރެލުމަށް ވެސް އެންމެ އެކަށޭނަ މަންޒިލެއްގެ ގޮތުގައި ފައިތިލަ ސާބިތުކުރުމަށް ހުޅިވެގެންދާ ދޮރެއް ގޮތުގައި ސައީދު ވަނީ ފާހަގަކުރައްވާފަ އެވެ.
ޕްރޮޖެކްޓް އައިލާ އަކީ ރާއްޖޭގައި ހިންގާ މިފަދަ ފުރަތަމަ މަޝްރޫ އެވެ. 2028 ވަނަ އަހަރަށް ނިންމާގޮތަށް ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްގެން ހިންގާ މި މަޝްރޫއުގައި ލަގްޒަރީ ރެސިޑެންސްތަކާއި، މެރީނާއަކާއެކު ތަރައްގީކުރާ އަލްޓްރާ ލަގްޒަރީ ރިސޯޓެއްގެ އިތުރުން، ބައިނަލްއަގުވާމީ ފެންވަރުގެ ސިއްހީ ހިދުމަތްދޭ މަރުކަޒަކާއި ހޮސްޕިޓާލިޓީ އެންޑް ލީޑަޝިޕް ދަސްކޮށްދޭ ދުނިޔޭގެ ފެންވަރުގެ ސްކޫލެއް ހިމެނެ އެވެ. މި ތަން ހިންގުމުގައި މަދުވެގެން 60 އިންސައްތަ އިއާދަކުރަނިވި ހަކަތަ ބޭނުންކުރާއިރު، ދެމެހެއްޓެނިވި އެކުއަކަލްޗާ އަދި ދަނޑުވެރިކަމުގެ ނިޒާމުތައް ވެސް މި މަޝްރޫއުގައި ހިމެނެ އެވެ.
