ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް، މިއަހަރުގެ ރަމަޟާން މަހުގެ "ރޯދަ ހަދިޔާ"ގެ ގޮތުގައި ކޮންމެ ގޭބިސީއަކަށް ދޭން ނިންމި މަސްދަޅު ކޭސްތައް އަތޮޅުތެރޭގެ ރަށްތަކަށް ބަހަން ފަށައިފި އެވެ.

ސިޓީސް މިނިސްޓރީން ބުނިގޮތުގައި، މިހާރު ބައެއް ރަށްރަށުގައި ގޭގެއަށް މަސްދަޅު ކޭސްތައް ބަހައި ވަނީ ނިމިފަ އެވެ. މިދިޔަ ހޮނިހިރު ދުވަހުން ފެށިގެން މާލެ ސަރަހައްދުގައި މަސްދަޅު ބަަހަން ފަށާފައިވާއިރު، މި ހަފްތާގެ ތެރޭގައި ވަނީ އަތޮޅުތެރޭގެ ރަށްރަށަށްވެސް މަސްދަޅު ކޭސްތައް ފޮނުވަން ފަށާފަ އެވެ.

އެ މިނިސްޓްރީން ބުނީ، ރަށްރަށުގެ ކައުންސިލްތައް މެދުވެރިކޮށް މި މަސައްކަތް ވަރަށް ހަލުވިކަމާއެކު ކުރިއަށްދާ ކަމަށެވެ. އެގޮތުން މިހާތަނަށް ހއ. އަތޮޅުގެ ތިން ރަށަކަށް މަސްދަޅު ފޮނުވިފައިވާއިރު، އެ އަތޮޅު މުރައިދޫގެ 137 ގޭބިސީއަކަށް މަސްދަޅު ބަހައި މިހާރު ވަނީ ނިމިފަ އެވެ.

މީގެ އިތުރުން ހދ. އަތޮޅުގެ ފިނޭގެ 100 ގޭބިސީއަށާއި، ނޮޅިވަރަންފަރުގެ 350 ގޭބިސީއަށްވެސް މަސްދަޅު ކޭސްތައް ހަވާލުކޮށް ނިމިފައިވާ ކަމަށް އެ މިނިސްޓްރީން ބުންޏެވެ. އަދި ނޮޅިވަރަމުގައި މަސްދަޅު ބެހުމުގެ މަސައްކަތް މިހާރު ކުރިއަށްދާއިރު، ނ. އަތޮޅުގެ ހުރިހާ ރަށަކަށް މިހާރު ވަނީ މަސްދަޅު ކޭސްތައް ފޮނުވާފަ އެވެ.

ޅ. އަތޮޅުގެ ހަތަރު ރަށަކަށް މަސްދަޅު ފޮނުވާފައިވާއިރު، އެ އަތޮޅު އޮޅުވެލިފުށީގެ 137 ގޭބިސީއަކަށް މަސްދަޅު ކޭސްތައް ހަވާލުކޮށް މިހާރު ވަނީ ނިމިފަ އެވެ.

ސަރުކާރުން ހާމަކޮށްފައިވާ ތަފާސްހިސާބުތަކަށް ބަލާއިރު، މި އަހަރު ޖުމްލަ 118,773 ގޭބިސީއަކަށް މަސްދަޅު ކޭސް ބެހުމަށް ވަނީ ހަމަޖެހިފަ އެވެ. މީގެ ތެރޭގައި ހިމެނެނީ މާލޭގެ 61,755 ގޭބިސީއަކާއި، އަތޮޅުތެރޭގެ ރަށްތަކާއި ސިޓީތަކުގެ 56,918 ގޭބިސީ އެވެ.

ރަށްރަށުގައި މި ހަދިޔާ ދޫކުރަމުން ދަނީ އެ ރަށެއްގެ ރަށު ކައުންސިލްތައް މެދުވެރިކޮށް، ކަނޑައެޅިފައިވާ އުސޫލުތަކުގެ މަތިންނެވެ. މިއީ ރަމަޟާން މަހާ ދިމާކޮށް ރައްޔިތުންނަށް ލުއިފަސޭހަކޮށްދިނުމުގެ ގޮތުން ރައީސް ޑރ. މުއިއްޒު ވެވަޑައިގެންފައިވާ ވައުދުފުޅުގެ ދަށުން ކުރިއަށްގެންދާ ހަރަކާތެކެވެ.