އިންޑިއާގެ އިރުމަތީ ސްޓޭޓް ކަމަށްވާ ވެސްޓް ބެންގަލްގައި ނިޕާ ވައިރަސް ފެތުރެން ފެށުމާ ގުޅިގެން އެގައުމުގެ ސިއްހީ އިދާރާތަކުން ސަމާލުވުމަށް އިލްތިމާސްކޮށްފި އެވެ.

އިންޑިއާގައި ކެރެލާ ސްޓޭޓުން މީގެ ކުރިން ފަސް ފަހަރެއްގެ މަތިން ނިޕާ ވައިރަސް ވަނީ ފެނިފަ އެވެ. ނަމަވެސް މިފަހަރު މި ބަލި ފެނިފައިވަނީ އިންޑިއާގެ ވެސްޓް ބެންގަލްގެ ޕްރައިވެޓް ހޮސްޕިޓަލެއްގައި މަސައްކަތް ކުރާ ދެ ނަރުހެއް ގައިން ކަމަށް ރިޕޯޓުތައް ބުނެ އެވެ. އަދި އެ ފަހުން އެ ހޮސްޕިޓަލުގެ ޑޮކްޓަރެއްވެސް އެ ބައްޔަށް ޕޮޒިޓިވް ވެފައިވާއިރު މިހާތަނަށް ފަސް މީހަކު މި ވައިރަހަށް ޕޮޒިޓިވް ވެ، ގާތްގަނޑަކަށް 100 މީހަކު ވަނީ ކަރަންޓީނު ކޮށްފަ އެވެ.

ނިޕާ ވައިރަސް އަކީ ޖަނަވާރުންގެ ފަރާތުން، ވަކިން ހާއްސަކޮށް ވާލުގެ ޒަރީއާއިން އިންސާނުންގެ ގަޔަށް އަރާ ވައިރަހެކެވެ. މީގެ އިތުރުން ބަލި ޖެހިފައިވާ އިންސާނެއްގެ ފަރާތުންވެސް އެހެން މީހުންނަށް މި ބަލި ފެތުރެ އެވެ. މި ބަލީގެ އަލާމާތްތަކުގެ ތެރޭގައި ހުން އައުން، ބޮލުގައި ރިއްސުން، ކެއްސުން، ނޭވާލާން އުނދަގޫވުން އަދި ސިކުނޑި ދުޅަވުން ހިމެނެ އެވެ. މި ބައްޔަށް މިހާތަނަށް ވަކި ހާއްސަ ވެކްސިނެއް ނުވަތަ ފަރުވާއެއް ހޯދިފައެއް ނުވެ އެވެ.

މި ބަލީގެ ނުރައްކާތެރިކަން ބޮޑީ ބަލި ޖެހޭ މީހުންގެ ތެރެއިން 40 އިންސައްތައާއި 75 އިންސައްތައާ ދެމެދުގެ އަދަދެއްގެ މީހުން މަރުވުމުގެ ފުރުސަތު އޮންނާތީ އެވެ.

މި ބަލި ފެތުރުމުގެ ފުރުސަތު އޮތުމުން، އެހެން ގައުމުތަކުން ވެސް ދަނީ ރައްކާތެރިކަމުގެ ފިޔަވަޅުތައް އަޅަމުންނެވެ. މިގޮތުން ތައިލެންޑުން އިންޑިއާއިން އެއާޕޯޓްތަކަށް އަންނަ މީހުން ސްކްރީންކުރަން ފަށާފައިވާއިރު، ތައިވާނުން ނިޕާ ވައިރަސްއަކީ ކެޓަގަރީ 5ގެ ބައްޔެއްގެ ގޮތުގައި ކަނޑައެޅުމަށް ދަނީ މަޝްވަރާ ކުރަމުންނެވެ.

އިންޑިއާގެ ވެސްޓް ބެންގަލްއަކީ ދިވެހިން ދަތުރުފަތުރުކޮށް އުޅޭ ސަރަހައްދަކަށް ނުވި ނަމަވެސް، އިންޑިއާގެ އެކި ހިސާބުތަކުގައި ބަލި ފެތުރެމުންދާތީ ރާއްޖެއިންވެސް މި ބައްޔަށް ސަމާލުވުން މުހިންމެވެ.