ހުޅުމާލޭ ދެވަނަ ފިޔަވަހީގައި ފަހިދިރިއުޅުން ކޯޕަރޭޝަން (އެފްޑީސީ)ގެ ބެލުމުގެ ދަށުން ތަރައްގީކޮށްފައިވާ 4،000 ހައުސިންގ ޔުނިޓަށް ކަރަންޓުގެ ހަިދުމަތް ދިނުމަށް ކުރަންޖެހޭ ހުރިހާ މަސައްކަތެއް ނިންމާލައިފި އެވެ.
ސްޓެލްކޯއިން ބުނިގޮތުގައި، މި މަޝްރޫއުގެ ދަށުން ކުރަންޖެހޭ ފަންނީ ހުރިހާ މަސައްކަތެއް މިހާރު ވަނީ ފުރިހަމަކޮށްފަ އެވެ. މީގެ ތެރޭގައި މެއިން ޕެނަލްތަކަށް ކޭބަލް އެޅުމާއި، ކަނެކްޝަންތައް ހަދައި ޓެސްޓުކުރުމުގެ އިތުރުން، ޕެނަލްތަކުން ފެށިގެން އެޕާޓްމަންޓްތަކާ ހަމައަށް ކަރަންޓު ގުޅައިދިނުމުގެ މަސައްކަތް ހިމެނެ އެވެ. ސްޓެލްކޯއިން ބުނީ މިކަމާ ގުޅޭ އެންމެހާ ޓެސްޓުތައްވެސް މިހާރު ކާމިޔާބުކަމާއެކު ނިންމާލާފައިވާ ކަމަށެވެ.
މިއަހަރުގެ ކުރީކޮޅު އެމްޑަބްލިއުއެސްސީން މި ޓަވަރުތަކަށް ފެނާއި ނަރުދަމާގެ ހިދުމަތް ގުޅައި ނިންމާފައިވާއިރު، ކަރަންޓުގެ ހިދުމަތާއެކު މި ފްލެޓްތަކަށް ބޭނުންވާ އަސާސީ ހުރިހާ ހިދުމަތެއް މިހާރު ވަނީ ފުރިހަމަވެފަ އެވެ.
އެފްޑީސީން މިހާރު އަންނަނީ ފްލެޓްތަކުގެ ތަޅުދަނޑި ހަވާލުކުރުމުގެ މަސައްކަތް ބާރުމިނެއްގައި ކުރަމުންނެވެ. އެ ކުންފުނީގެ އަމާޒަކީ މި ހިނގާ މަހުގެ ނިޔަލަށް ހުރިހާ ތަޅުދަނޑިތަކެއް ހަވާލުކޮށް ނިންމުމެވެ. މިހާރުވެސް ތަޅުދަނޑި ހަވާލުކުރެވުނު ގިނަ ފަރާތްތަކަކުން ދަނީ ފްލެޓްތަކަށް ބަދަލުވަމުންނެވެ. އަދި ބައެއް އާއިލާތަކުން އަންނަނީ ރޯދަ މަހުގެ ކުރިން ފްލެޓްތަކަށް ވަދެވޭތޯ ތައްޔާރުވަމުންނެވެ.
އާންމުން ފްލެޓްތަކަށް ވަންނަން ފަށާފައިވާއިރު، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ދަނީ އެ ސަރަހައްދުގެ މަގުތަކާއި ވަށައިގެންވާ މާހައުލު ތަރައްގީކުރުމުގެ މަސައްކަތް ކުރަމުންނެވެ. މީގެ އިތުރުން އެ ސަރަހައްދުގައި ދިރިއުޅެން ފަށާފައިވާ އާއިލާތަކަށް ބޭނުންވާ އިތުރު ލުއިފަސޭހަ ހިދުމަތްތައް ގާއިމުކުރުމުގެ މަސައްކަތްވެސް ކުރިއަށްދާ ކަމަށް އެ ކުންފުނިން ފާހަގަކުރި އެވެ.
ހުޅުމާލޭގައި ތަރައްގީކޮށްފައިވާ މި ހައުސިން ޔުނިޓުތައް ބެހިފައިވަނީ "އަމާން އުދަރެސް" ގެ 16 ޓަވަރާއި "އަމާން ދޯދީ" ގެ 16 ޓަވަރުގެ މައްޗަށެވެ. މީގެ ތެރޭގައި ހިމެނެނީ 2 ކޮޓަރީގެ އެޕާޓްމަންޓްތަކާއި 3 ކޮޓަރީގެ އެޕާޓްމަންޓްތަކެވެ.
