އަލަށް އުފެއްދި ޣައްޒާ ބޯޑް އޮފް ޕީސް އާއި ގުޅުމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި ދަޢުވަތު މޮރޮކޯގެ ރަސްގެފާނު މުޙައްމަދު ހަވަނަ، ޤަބޫލުކުރައްވައިފިއެވެ.
އުތުރު އެފްރިކާގެ ޤައުމުން ބުނީ ބޯޑު އޮފް ޕީސްއާ ގުޅުމަށް ޓްރަމްޕް ދެއްވި ދައުވަތު ޤަބޫލު ކުރީ އެކަމުގެ ސަބަބުން މެދުއިރުމަތީގެ ޞުލްޙަ ޤާއިމް ކުރުމަށް މަގު ފަހިވާނެ ތީއެވެ.
އެ ޤައުމުގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ ރަސްގެފާނު އެއްބަސްވީ ބޯޑުގެ ފައުންޑިން މެމްބަރަކަށް ވުމަށެވެ.
އެ މިނިސްޓްރީން ބުނި ގޮތުގައި މޮރޮކޯގެ ރަސްގެފާނު ވެސް ވަނީ އެ ސަރަޙައްދުގައި ޞުލްޙަ ޤާއިމް ކުރުމަށް ޓްރަމްޕް ވިދާޅުވެފައިވާ ކަންކަމަށް މަރުޙަބާ ވިދާޅުވެފައެވެ.
ހުކުރު ދުވަހުގެ ރޭ ވައިޓް ހައުސްއިން ވަނީ ޣައްޒާގައި އިންތިޤާލީ މަރުޙަލާ ބެލެހެއްޓުމަށް ކަނޑައަޅާފައިވާ ހަތަރު އިދާރާގެ ތެރެއިން އެއް އިދާރާ ކަމަށްވާ ނޭޝަނަލް ކޮމިޓީ ފޯ ދަ އެޑްމިނިސްޓްރޭޝަން އޮފް ޣައްޒާގެ ރުހުން ދިނުމާއި އެކު ބޯޑް އޮފް ޕީސް އެކުލަވާލާނެކަން އިއުލާންކޮށްފައެވެ.
މި ކައުންސިލް އުފައްދާ ދަނޑިވަޅަކީ 2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާގައި ހިންގި ޤަތުލުޢާންމުގައި 71،000 އަށް ވުރެ ގިނަ މީހުން ޝަހީދުވެ 171،000 އަށް ވުރެ ގިނަ މީހުން ޒަޚަމް ކޮށްލާފައިވާ ނަސްލު ނައްތާލުމުގެ ބިރުވެރި ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާ ފެށުމުގެ ވަގުތާއެވެ.
މިއީ ޓްރަމްޕް ހުށަހެޅުއްވި 20 ނުކުތާގެ ޕްލޭނެއްގެ ތެރެއިން އުފައްދާ ބޯޑެކެވެ.
މި ބޯޑުގެ ދާއިމީ މެންބަރަކަށް ވާން ބޭނުންވާ ކޮންމެ ޤައުމަކުން 1 ބިލިއަން އެމެރިކާ ޑޮލަރު ދައްކަން ޖެހޭނެ ކަމަށް ޓްރަމްޕް ވަނީ ބުނެފައެވެ.
