ސޯޝަލް މީޑިޔާގެ ސަބަބުން ކުޑަކުދިންނަށް ކުރިމަތިވާ ގޮންޖެހުންތަކުން އެކުދިން ސަލާމަތް ކުރުމަށްޓަކައި، އޮސްޓްރޭލިއާ އިން އެކުލަވާލި އުސޫލުތަކާ އެއްގޮތަށް ކުޑަކުދިން ސޯޝަލްމީޑިއާ ބޭނުންކުރުން މަނާކުރުމާ ގުޅޭގޮތުން އިނގިރޭސިވިލާތުން މަޝްވަރާކުރަން ފަށައިފި އެވެ.
އިނގިރޭސި ސަރުކާރުން ހާމަކުރި ގޮތުގައި، ދުނިޔޭގެ އެކި ކަންކޮޅުތަކުގައި ކުޑަކުދިންގެ ހިމާޔަތަށް އަޅާފައިވާ ފިޔަވަޅުތަކާއި އޭގެ ނަތީޖާތައް އެގައުމުން މިހާރު ދަނީ ވަރަށް ގާތުން ބަލަމުންނެވެ. މީގެ ތެރޭގައި ކުޑަކުދިންނަށް ސޯޝަލްމީޑިއާ މަނާކުރުމަކީ އެންމެ އެދެވޭ ހައްލުތޯ ބެލުމާއި، އެފަދަ ނިންމުމެއް ނިންމައިފިނަމަ އެކަން އަމަލީގޮތުން ތަންފީޒުކުރާނެ ގޮތްތަކާ މެދު ދިރާސާ ކުރަމުންދާ ކަމަށްވެސް ބުނެފައިވެ އެވެ.
މިފަދަ މަޝްވަރާތަކެއް ފެށިފައި މިވަނީ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ކުޑަކުދިންނަށް ނޭދެވޭ އަސަރުކުރާނެ ކޮންޓެންޓް އުފެއްދުން އިތުރުވެފައިވާ ދަނޑިވަޅެއްގަ އެވެ. ހާއްސަކޮށް، އީލޮން މަސްކްގެ 'ގްރޮކް، އެކްސް އޭއައި' މެދުވެރިކޮށް ކުޑަކުދިންގެ ފޮޓޯތައް ބަރަހަނާކޮށް ބަދަލުކުރެވޭ މައްސަލަ ބޮޑުވެފައިވާ ވަގުތެއްގަ އެވެ.
Advertisement
އިނގިރޭސި ސަރުކާރުން އިތުރަށް ބުނީ، އޭއައި ބޭނުންކޮށްގެން މީހުންގެ ފޮޓޯ ބަރަހަނާކުރުން މަނާކުރުމުގެ އިތުރުން، ކުޑަކުދިން ގެންގުޅޭ ފޯނާއި ޓެބްލެޓް ފަދަ ތަކެތިން ބަރަހަނާ މަންޒަރުތައް ނުފެންނާނެ ގޮތް ހެދުމަށް މަސައްކަތް ކުރަމުންދާ ކަމަށެވެ.
އޮސްޓްރޭލިއާގެ އިންޓަނެޓް ރެގިއުލޭޓަރުން ބުނާ ގޮތުގައި އޮސްޓްރޭލިއާގެ 16 އަހަރުން ދަށުގެ ކުދިންގެ ތެރެއިން 96 ޕަސެންޓް ކުދިންނަކީ ސޯޝަލް މީޑިއާ އެކައުންޓްތައް ގެންގުޅޭ ކުދިންނެވެ. އެގައުމުން މިދިޔަ ޑިސެމްބަރު މަހު 16 އަހަރުން ދަށުގެ ކުދިންނަށް ސޯޝަލްމީޑިއާ މަނާކުރުމާ ގުޅިގެން، މިހާތަނަށް އެ އުމުރުފުރައިގެ ކުދިން ބޭނުންކުރި ގާތްގަނޑަކަށް ފަސް މިލިއަން އެކައުންޓް ވަނީ ޑިލީޓްކޮށްފަ އެވެ.
މިއީ ދުނިޔޭގައި މިފަދަ ހަރުކަށި ފިޔަވަޅެއް އެޅި ފުރަތަމަ ފަހަރެވެ. އޮސްޓްރޭލިއާގައި 16 އަހަރުން ދަށުގެ ކުދިންނަށް އިންސްޓަގްރާމް، ފޭސްބުކް، ޔޫޓިއުބް، ޓިކްޓޮކް، ސްނެޕްޗެޓް އަދި އެކްސް ފަދަ ޕްލެޓްފޯމްތައް ބޭނުން ނުކުރެވޭނެ އެވެ. އަދި ކުޑަކުދިންގެ އެކައުންޓްތައް ޑިލީޓް ނުކުރާ ކުންފުނިތައް 33 މިލިޔަން އެމެރިކާ ޑޮލަރާ ހަމައަށް ޖޫރިމަނާ ކުރެވޭނެ ގޮތަށް އޮސްޓްރޭލިއާގެ ގާނޫނު ވަނީ ބައްޓަންކޮށްފަ އެވެ.
