ކުރިއަށް އޮތް ހޫނު މޫސުމަށް ތައްޔާރުވުމުގެ ގޮތުން 12 ރަށަކަށް ޖަނަރޭޓަރުތައް ފޮނުވުމުގެ މަސައްކަތް ސްޓެލްކޯއިން ފަށައިފި އެވެ.
ސްޓެލްކޯއިން ބުނެފައިވަނީ ދެމެހެއްޓެނިވި ގޮތެއްގައި ކަރަންޓު ފޯރުކޮށްދިނުމަށްޓަކައި ކުރިއަށް އޮތް ޕީކު ސީޒަނަށް ތައްޔާރުވުމުގެ ގޮތުން ކުރަމުންދާ މަސައްކަތުގެ ތެރެއިން އަލަށް ގެނެވުނު ޖަނަރޭޓަރު ސެޓުތައް ރަށްރަށަށް ފޮނުވުމުގެ މަސައްކަތް ކުރަމުންދާ ކަމަށެވެ.
މި މަސައްކަތްތަކާއެކު ސްޓެލްކޯއަށް ރައްޔިތުންގެ މެދުގައި އޮތް އިތުބާރު ބޮޑުވެގެންދާނެ ކަމަށް އެކްސްގައި އެ ކުންފުނިން ކުރި ޕޯސްޓުގައި ލިޔެފައިވެ އެވެ.
މި ޖަނަރޭޓަރު ސެޓުތަކުގެ ތެރޭގައި ހިމެނެނީ 600 ކިލޯވޮޓް، 800 ކިލޯވޮޓް އަދި 1،000 ކިލޯވޮޓްގެ ޖަނަރޭޓަރުތަކެވެ. ޖަނަރޭޓަރު ސެޓުތައް ފޮނުވަނީ ކޮން ރަށްތަކަށް ކަމެއް ސްޓެލްކޯއިން މައުލޫމާތު ދީފައެއް ނުވެ އެވެ.
ރަމަޟާން މަހަށް ތައްޔާރުވުމުގެ ގޮތުން ރަށްރަށުގައި ދިމާވަމުންދާ ކަރަންޓުގެ މައްސަލަތައް ހައްލުކުރުމަކީ ސަރުކާރުން ކުރަމުންދާ މަސައްކަތްތަކެވެ.
އާދަޔާ ހިލާފަށް ކޮންމެ ރޯދަމަހެއްގައިވެސް ގޭބިސީތަކުން ކަރަންޓު ބޭނުންކުރާ މިންވަރު އިތުރުވަމުންދާތީ ނިމިދިޔަ އަހަރެކޭ އެއްގޮތަށް މިއަހަރުވެސް ކަރަންޓު ބިލުން ޑިސްކައުންޓު ދޭން ރައީސް ޑރ. މުޢިއްޒު ވަނީ ނިންމަވާފަ އެވެ. މިދިޔަ އަހަރު ކަރަންޓު ބިލުގެ ޑިސްކައުންޓުގެ ގޮތުގައި މުޅި ޖުމްލަ 140 މިލިއަން ރުފިޔާ ދީފައިވާއިރު، ނިމިދިޔަ އަހަރު ސަރުކާރަށް ދެ އަހަރު ފުރުން ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ޑޮމެސްޓިކް ރޭޓުގައި ބިލުކުރާ ކޮންމެ ބިލަކަށް އެންމެ ގިނަވެގެން ނަގާނީ 400 ރުފިޔާ ކަމަށެވެ.
