ސައޫދީ ޢަރަބިއްޔާގެ އެންމެ ދުވަސްވީ މީހާ ކަމަށްވާ ނާޞިރު ބިން ރަދާން އާލު ރާޝިދު އަލް ވަދްޢާނީ، ޢުމުރުން 142 އަހަރުގައި ނިޔާވެއްޖެއެވެ. އޭނާ ނިޔާވީ މިމަހުގެ 11 ވަނަ ދުވަހުގައި ކަމަށް ސައޫދީ ނޫސްތަކުގައި ވެއެވެ.
ސައުދީގެ އެތައް ރަސްރަސްކަލުންގެ ވެރިކަމުގެ ތެރޭގައި ދިރިއުޅުއްވި އަލް ވަދްޢާނީ އަކީ ދީނީ ކަންކަމުގައި ވަރަށް ފަރުވާތެރިކަން ބެހެއްޓި، 40 އަށް ވުރެ ގިނަ ފަހަރު ޙައްޖުގެ އަޅުކަން ކޮށްފައިވާ މީހެއް ކަމަށް އޭނާ ދަންނަ މީހުންނާއި ޙަވާލާދީ ރިޕޯޓުތަކުގައި ބުނެފައި ވެއެވެ.
ދީނީ ކަންކަމަށް ލޯބި ކުރެއްވި ވަދްޢާނީ ނިޔާވި އިރު، ދަރީންނާއި ކާފަދަރީންނާއި މުނިކާފަދަރީން ހިމެނޭހެން 134 ކުދިން ދުނިޔޭގައި އެބަތިއްބެވެ. މިއީ ސައޫދީ ރަސްކަމުގައި އެނގިފައިވާ އެންމެ ބޮޑު އެއް އާއިލީ ނަސްލެވެ.
