ދުނިޔޭގައި އެންމެ މަގުބޫލު އެއް ސޯޝަލް މީޑިއާ ޕްލެޓްފޯމް ކަމަށްވާ ޓިކްޓޮކުން، ކުރު ޑްރާމާ ސީރީޒްތަކަށް އަމާޒުކޮށްގެން "ޕައިންޑްރާމާ" ގެ ނަމުގައި އާ އެޕްލިކޭޝަނެއް ބާޒާރަށް ނެރެފިއެވެ.
މި އާ އެޕްލިކޭޝަން މިހާރު ވަނީ އެމެރިކާ އާއި ބްރެޒިލްގެ އައިއޯއެސް އަދި އެންޑްރޮއިޑް ފޯނުތަކަށް ލިބޭނެ ގޮތް ހަދާފަ އެވެ.
ބިޒްނަސް އިންސައިޑާގެ ރިޕޯޓްތައް ބުނާގޮތުން، މިއީ އެއް މިނެޓުގެ ކުރު ބައިތަކެއްގެ މައްޗަށް އެކުލެވޭ ހިޔާލީ ވާހަކަތައް ގެނެސްދޭ ޕްލެޓްފޯމެކެވެ. މިވަގުތު އެއްވެސް އިޝްތިހާރަކާ ނުލައި ހިދުމަތް ދެމުންދާ މި އެޕްގައި ތްރިލާ އާއި ލޯބީގެ ވާހަކަތައް ހިމެނޭއިރު، "ލަވް އެޓް ފަސްޓް ބައިޓް" ފަދަ ސީރީޒްތައް ފާހަގަކޮށްލެވެ އެވެ.
ޕައިންޑްރާމާ ފަރުމާކޮށްފައިވަނީ ޓިކްޓޮކްގެ އަސްލު ބައްޓަމާ އެއްގޮތަށް ޕޯޓްރެއިޓް ވީޑިއޯ ފީޑެއް މެދުވެރިކޮށް ކޮންޓެންޓް ބަލާލެވޭ ގޮތަށެވެ. މީގެ އިތުރުން އާ ވީޑިއޯތައް ހޯދުމަށް "ޑިސްކަވާ" ބަޔަކާއި، ބަލާފައިވާ އެޕިސޯޑުތައް އެނގޭނެ "ވޮޗް ހިސްޓްރީ" އަދި ގަޔާވާ ޑްރާމާތައް ރައްކާކުރެވޭނެ "ފޭވަރިޓްސް" ބައެއް ވެސް މި އެޕްގައި ހިމަނާފައިވެ އެވެ.
މައިކްރޯ ޑްރާމާ ތަކަކީ މުނިފޫހި ފިލުވުމުގެ ދާއިރާގައި މިހާރު ވަރަށް ބާރަށް ކުރިއަރަމުން އަންނަ ސިނާއަތެކެވެ. ކުރިން ކުއިބީ ފަދަ ބޮޑު ބަޖެޓުގެ ޕްލެޓްފޯމްތަކަށް ނާކާމިޔާބީއާ ކުރިމަތިލާން ޖެހުނު ނަމަވެސް، ރީލްޝޯޓް އަދި ޑްރާމާބޮކްސް ފަދަ ކުޑަ ބަޖެޓުގެ އެޕްތަކަށް ވަނީ ބޮޑު ތަރުހީބެއް ލިބިފަ އެވެ. ވޭރިއަޓީން ލަފާކުރާ ގޮތުގައި 2030 ވަނަ އަހަރާ ހަމައަށް މި ދާއިރާއިން އަހަރަކު 26 ބިލިއަން ޑޮލަރުގެ އާމްދަނީއެއް އުފައްދާނެ އެވެ.
ޓިކްޓޮކްގެ މި އާ އުފެއްދުމަކީ ކުރު ވީޑިއޯގެ ދާއިރާގައި އެ ކުންފުންޏަށް ލިބިފައިވާ ތަޖުރިބާ ބޭނުންކޮށްގެން، މުނިފޫހިފިލުވުމުގެ އާ މާކެޓެއްގައި ފައިތިލަ ސާބިތުކުރުމަށް އެޅި ފިޔަވަޅެކެވެ. ޕައިންޑްރާމާގެ ކާމިޔާބީ ބިނާވެފައިވަނީ ކޮންމެ މިނެޓަކުން ވެސް ބެލުންތެރިން ހިފަހައްޓާލެވޭ ފަދަ މޮޅު ކޮންޓެންޓް އުފެއްދުމުގެ މައްޗަށެވެ.
