މާލޭގައި އަލަށް ބިނާކުރާ މަސްޖިދުލް ޔޫސުފުލް ބަރުބަރީ މިސްކިތް ކުރިއަށް އޮތް ބަރަކާތްތެރި ރަމަޟާން މަހުގެ ކުރިން ހުޅުވޭނެ ކަމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ސޯޝަލް މީޑިއާގައި ހިއްސާކުރެއްވި ޕޯސްޓެއްގައި މިނިސްޓަރު ވިދާޅުވީ، ބަރުބަރީ މިސްކިތުގެ މަސައްކަތްތައް ވަރަށް ބާރުސްޕީޑުގައި ކުރިއަށްދާ ކަމަށާއި، ވަރަށް އަވަހަށް މިސްކިތުގެ ހުރިހާ މަސައްކަތްތަކެއް ނިމޭނެ ކަމަށެވެ. އަދި އަމާޒަކީ ރަމަޟާން މަސް ފެށުމުގެ ކުރިން އެ މިސްކިތް ހުޅުވައި، މި އަހަރުގެ ރަމަޟާން މަހުގައި ނަމާދުކުރެވޭނެ ގޮތް ހަމަޖެއްސުން ކަމަށްވެސް މިނިސްޓަރު ފާހަގަކުރެއްވި އެވެ.
ތިން ބުރިއަށް އިމާރާތްކުރާ މި މިސްކިތަކީ އެއްފަހަރާ 1400 މީހުންނަށް ނަމާދުކުރެވޭނެ ފަދަ ތަނަވަސް ޖާގައެއް އޮތް މިސްކިތެކެވެ. މި މިސްކިތް ބިނާކުރުމުގެ މަސައްކަތް އިސްލާމިކް މިނިސްޓްރީން އަމިއްލަ ފަރާތަކާ ހަވާލުކޮށް، އެކަމުގެ އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ޖަނަވަރީ މަހުގެ ތެރޭގަ އެވެ.
ރާއްޖޭގެ އެކި ކަންކޮޅުތަކުގައި ނަމާދުކުރާނެ ޖާގަ އިތުރުކުރުމަށް މިސަރުކާރުން ދެއްވާ އިސްކަމުގެ ދަށުން، މި އަހަރުގެ ތެރޭގައި ގިނަ މިސްކިތްތަކެއް ހުޅުވުމަށް ވަނީ ރޭވިފައެވެ. ކޮންމެ އަހަރެއްގެވެސް ރަމަޟާން މަހާ ދިމާކޮށް އާ މިސްކިތްތައް ހުޅުވުމާއި، މިސްކިތްތަކުގެ އާބާތުރަ ފިލުވުމަކީ ސަރުކާރުން ހާއްސަ ސަމާލުކަމެއް ދީގެން ކުރަމުން އަންނަ މަސައްކަތެކެވެ.
އިސްލާމިކް މިނިސްޓްރީން ހާމަކުރި ގޮތުގައި، އަންނަ ރަމަޟާން މަހަށް ތައްޔާރުވުމުގެ ގޮތުން ރާއްޖޭގެ އެކި ސަރަހައްދުތަކުން ޖުމްލަ 15 މިސްކިތެއްގެ މަސައްކަތް ނިންމައި، އާންމުންނަށް ހުޅުވާލުމަށް މިހާރު ދަނީ ތައްޔާރުވަމުންނެވެ. މި މަޝްރޫއުތަކަކީ ރައްޔިތުންނަށް ދީނީ އަޅުކަން އަދާކުރުމުގައި ލުއިފަސޭހަ ކޮށްދިނުމަށްޓަކައި ކުރިއަށްގެންދާ މުހިންމު މަސައްކަތްތަކެކެވެ.
