ސަރުކާރުން އަލަށް ތައާރަފުކުރުމަށް ނިންމާފައިވާ ގައުމީ ޓެކްސީ ލައިންގެ ހިދުމަތަށް ބޭނުންވާ ޑްރައިވަރުން ހޯދުމަށް މިއަދު މާލޭގައި ކުރިއަށްގެންދިޔަ ވޯކް-އިން-އިންޓަވިއަށް ބޮޑު ތަރުހީބެއް ލިބި، 250 އަށްވުރެ ގިނަ މީހުންނާ އިންޓަވިއުކޮށްފި އެވެ.
ޓްރާންސްޕޯޓް މިނިސްޓްރީގެ އިރުޝާދުގެ ދަށުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕަނީ (އެމްޓީސީސީ) އިން ކުރިއަށްގެންދާ މި މަޝްރޫއަކީ، މާލެ ސަރަހައްދުގައި ޓެކްސީގެ ހިދުމަތް ހޯދުމުގައި އާންމުންނަށް ކުރިމަތިވަމުންދާ ދަތިތަކަށް ދާއިމީ ހައްލެއް ހޯދައިދިނުމަށް ސަރުކާރުން ފައްޓަވާފައިވާ މުހިންމު މަސައްކަތެކެވެ.
މާފަންނު ބަސް ޓާމިނަލުގައި މިއަދު ހެނދުނު 10:00 އިން ފެށިގެން އިރުއޮއްސު 18:00 އަށް ކުރިއަށްދިޔަ މި އިންޓަވިއުތަކުގައި ބައިވެރިވުމަށް ގިނަ އަދަދެއްގެ ޒުވާނުންނާއި ތަޖުރިބާކާރު ޑްރައިވަރުން ވަނީ ހާޒިރުވެފަ އެވެ. އެމްޓީސީސީން މީޑިއާތަކަށް މައުލޫމާތު ދިން ގޮތުގައި، މިއަދުގެ ފުރުސަތުގައި ޖުމްލަ 269 މީހަކާއި ވަނީ އިންޓަވިއުކޮށްފަ އެވެ.
މި ހިދުމަތަށް ޖުމްލަ 407 ޑްރައިވަރުން ހޯދުމަށް ވަނީ އިއުލާނުކޮށްފަ އެވެ. އޭގެ ތެރޭގައި ހިމެނެނީ ފުލްޓައިމްކޮށް މަސައްކަތްކުރާނެ 285 ޑްރައިވަރުންނާއި ޕާޓްޓައިމްކޮށް މަސައްކަތްކުރާނެ 122 ޑްރައިވަރުންނެވެ. އެމްޓީސީސީން ބުނި ގޮތުގައި، ޑްރައިވަރުން ހޮވުމުގައި މިހާރުވެސް ޓްރާންސްޕޯޓް މިނިސްޓްރީގެ ދަފްތަރުގައި ރަޖިސްޓްރީވެފައިވާ ފަރާތްތަކަށް އިސްކަންދޭނެ އެވެ. މީގެ ބޭނުމަކީ މިހާރުވެސް މި ދާއިރާގައި މަސައްކަތްކުރާ ފަރާތްތަކަށް ސަރުކާރުގެ މި އާ ނިޒާމުގެ ތެރެއިން ރައްކާތެރިކަމާއެކު އާމްދަނީ ހޯދޭނެ މަގު ފަހިކޮށްދިނުމެވެ.
މި ހިދުމަތާ ގުޅޭގޮތުން ދަތުރުފަތުރާ ބެހޭ ވަޒީރު މުހައްމަދު އަމީން ވިދާޅުވީ، ސަރުކާރުގެ އަމާޒަކީ ދުނިޔޭގެ ކުރިއަރާފައިވާ ގައުމުތަކުގައި ބޭނުންކުރާ "އޫބާ" އަދި "ގްރޭބް" ފަދަ ޒަމާނީ އެޕްލިކޭޝަނެއް މެދުވެރިކޮށް 24 ގަޑިއިރު އިތުބާރު ހިފޭ ހިދުމަތެއް ފޯރުކޮށްދިނުން ކަމަށެވެ. އަދި މި ހިދުމަތުގައި ބޭނުންކުރާނީ ތިން ސައިޒެއްގެ ތިމާވެއްޓާ ރައްޓެހި އިލެކްޓްރޯނިކް (އީވީ) ކާރުތަކެއް ކަމަށްވެސް ވަޒީރު ފާހަގަކުރެއްވި އެވެ.
ހިދުމަތް ފެށުން ލަސްވަމުންދާ ސަބަބާ ގުޅޭގޮތުން ވަޒީރު އިތުރަށް ވިދާޅުވީ، ރާއްޖޭގެ މާހައުލަކީ ލޮނުގެ އަސަރު ބޮޑު ތަނަކަށް ވުމުން، އުޅަނދުތައް ގިނަ ދުވަހު ދެމެހެއްޓެނިވި ގޮތެއްގައި ބޭނުންކުރެވޭނެ ގޮތަށް އުފެއްދުންތެރިން މެދުވެރިކޮށް ބައެއް ބަދަލުތައް ގެންނަން ޖެހިފައިވާ ކަމަށެވެ. ނަމަވެސް މިހާރު އެ މަސައްކަތްތައް ނިމި، އުޅަނދުތައް ތައްޔާރުކުރުމުގެ ފަހުގެ މަސައްކަތްތައް ބާރުސްޕީޑުގައި ކުރިއަށްދާ ކަމަށް ސަރުކާރުން ފާހަގަކުރި އެވެ.
