ޤަތަރު ބޭސްގައި ތިބި އެމެރިކާ ސިފައިން އެތަން ދޫކޮށް ދިޔުމަށް އެމެެރިކާއިން އަންގައިފިއެވެ.
ވޮޝިންގޓަނުން އެންގީ މިއަދު އަލް އުދައިދް އެއާ ބޭސްގައި ތިބި އެމެރިކާގެ ހުރިހާ ސިފައިން އެތަނުން ދިޔުމަށެވެ.
ޚަބަރު ލިބޭ ގޮތުގައި އެމެރިކާ އާއި އީރާނާއި ދެމެދު ފިތުނަތައް އިތުރުވަމުންދާ ދަނޑިވަޅެއްގައި އެމެރިކާ އިން މި ފިޔަވަޅު އެޅީ ސަލާމަތީ ފިޔަވަޅެއްގެ ގޮތުންނެވެ.
އެމެރިކާ އިން ގެންދަނީ އީރާނަށް ޙަމަލާ ދިނުމަށް ވެސް ތައްޔާރުވަމުންނެވެ. ނަމަވެސް އޮފިޝަލުން ފާހަގަކުރެއްވި ގޮތުގައި އެމެރިކާއިން އީރާނަށް ދޭން ކައިރިވެފައިވާ ހަމަލާއެއް އަދި ކަށަވަރެއް ނުވެއެވެ.
އަލް އުދައިދް އެއާ ބޭސް އަކީ މެދުއިރުމަތީގައިވާ އެމެރިކާގެ އެންމެ ބޮޑު އަސްކަރީ މަރުކަޒެވެ. ގާތްގަނޑަކަށް އެމެރިކާގެ 10،000 ސިފައިން މެދުއިރުމަތީގައި ތިބިއިރު، ޤަޠަރު ބޭސް އަކީ އެމެރިކާގެ ސެންޓްރަލް ކޮމާންޑްގެ އޮޕަރޭޝަންތަކުގެ އެންމެ މުހިއްމު ހަބެވެ.
