ބުރުގާ އަޅައިގެން ހުރި އަންހެން ދަރިއަކު ކޮންމެވެސް އެއްދުވަހަކުން އިންޑިއާގެ ބޮޑުވަޒީރުކަން ކުރާނޭކަމުގެ ހުވަފެން ދެކެވަޑައިގަންނަވާކަމަށް އިންޑިއާގެ މަޝްހޫރު ދީނީ އަދި ސިޔާސީ ލީޑަރެއްކަމުގައިވާ އަސަދުއްދީން އޮވައިސީ ވިދާޅުވެއްޖެ އެވެ.
އިންޑިއާގެ މުސްލިމުންގެ އެންމެ ބޮޑު އެއް ސިޔާސީ ޕާޓީ ކަމަށްވާ އޯލްއިންޑިއާ މަޖިލިސް އިއްތިޙާދުލް މުސްލިމީންގެ ވެރިޔާ އަސަދުއްދީން ބުރުގާ އެޅި އަންހެނަކު އިންޑިއާގެ ބޮޑުވަޒީރަކަށް ވާތަން ދެކެން ބޭނުންކަމަށް ވިދާޅުވުމުން ހިންދޫންގެ ވަރަށް ގިނަ ބަޔަކު ދަނީ އެ ވާހަކައަށް ފާޑުކިޔަމުންނެވެ.
މަހާރާޝްތުރާގެ ރަށެއް ކަމަށްވާ ސޯލާޕޫރު ސިޓީގައި ބޭއްވި ޖަލްސާއެއްގައި ވާހަކަފުޅު ދައްކަވަމުން އަސަދުއްދީން ވިދާޅުވީ އިންޑިއާގެ ފުރަތަމަ ލޯ މިނިސްޓަރު ބާބާސާހެބް އަމްބެޑްކާރު ލިއުއްވި ގާނޫނުއަސާސީގައި އިންޑިއާގެ ކޮންމެ ރައްޔިތަކަށް ވެސް ބޮޑުވަޒީރު، ޗީފް މިނިސްޓަރު ނުވަތަ މޭޔަރަކަށް ވުމުގެ ހައްގު ލިބިގެންވާ ކަމަށެވެ.
އަސަދުއްދީންގެ ބަޔާނާ ގުޅިގެން ބާރަތިޔާ ޖަނަތާ ޕާޓީ (ބީޖޭޕީ) އިން ވަނީ ހަލަބޮލިވެ، އޭނާއަށް ވަރަށް ބޮޑަށް ފާޑުކިޔަން ފަށާފަ އެވެ.
އަސަދުއްދީންގެ ވާހަކައަށް ޖަވާބު ދެމުން ބީޖޭޕީން ބުނީ އަސަދުއްދީން ފުރަތަމަ އޭނާގެ ޕާޓީގެ ރައީސަކަށް ހަދަން ޖެހޭނީ ބުރުގާއެޅި މުސްލިމް އަންހެނެއް ކަމަށެވެ.
ބީޖޭޕީން ބުނީ ގާނޫނުއަސާސީން އެއްވެސް އަންހެނަކު ބޮޑުވަޒީރަކަށްވުން ހުއްޓުވާފައި ނުވި ނަމަވެސް އަސަދުއްދީން އަމަލީ މިސާލެއް ދައްކަވަން ޖެހޭ ކަމަށެވެ.
އަނެއްކޮޅުން އާސާމްގެ ޗީފް މިނިސްޓަރު ހިމަންތާ ބިސްވާ ސަރްމާ ވިދާޅުވީ ގާނޫނު އަސާސީގައި އެއްވެސް ހުރަހެއް ނެތް ނަމަވެސް، އިންޑިއާއަކީ ހިންދޫ ތަހުޒީބުގެ ގައުމެއް ކަމަށާއި ބޮޑުވަޒީރަކީ ހިންދޫއަކަށް ވާންޖެހޭނެ ކަމަށެވެ.
ހައްދުފަހަނަޅާފައިވާ ހިންދޫންގެ ޖަމާއަތެއްކަމުގައިވާ ޝިވްސޭނާގެ އިސްބޭފުޅެއްކަމުގައިވާ ޝައިނާ އެންސީ ވިދާޅުވީ ބޮޑުވަޒީރުގެ މަގާމު މިވަގުތު ހުހަށް ނެތްކަމަށާއި ލީޑަޝިޕްގެ މިންގަނޑަކީ ދީން ނޫން ކަމަށާއި ގާބިލުކަން ކަމަށެވެ.
މުސްލިމުންނާ ދެކޮޅުވެރިވެ ނަފުރަތު އުފައްދާ މީހުންނަށް އަސަދުއްދީން ފާޑުވިދާޅުވެ، ނަފްރަތު ދިގުދެމިގެން ނުދާނެ ކަމަށާއި ކޮންމެވެސް ދުވަހަކުން ލޯތްބަށް ކުރިއެރުން ލިބޭނޭކަމަށް ވެސް ވިދާޅުވި އެވެ.
އިންޑިއާގެ އާބާދީގައި މި ވަގުތު ގިނައީ ހިންދޫންކަމަށް ވިޔަސް، އިންޑިއާގައި މުސްލިމުންގެ އާބާދީ ދަނީ ވަރަށް ބޮޑަށް އިތުރުވަމުންނެވެ.
