ސައުދީ އަރަބިއްޔާގެ ޖިއްދާގައި ކުޅުނު ސްޕެނިޝް ސުޕަ ކަޕްގެ ފައިނަލް މެޗުގައި ރެއާލް މެޑްރިޑްގެ މައްޗަށް ކުރިހޯދައި، ބާސެލޯނާއިން ވިދިވިދިގެން ދެވަނަ ފަހަރަށް އެ މުބާރާތުގެ ތަށި ކާމިޔާބުކޮށްފި އެވެ.
މިއީ ބާސެލޯނާއިން ސުޕަ ކަޕްގެ ތަށި އުފުލާލި 16 ވަނަ ފަހަރެވެ. ރޭގެ ފޯރިގަދަ ކުރިމަތިލުން ބާސާއިން ކާމިޔާބުކުރީ 3-2 ގެ ނަތީޖާއަކުންނެވެ. މިދިޔަ އަހަރުގެ ފައިނަލުގައިވެސް މި ދެ ޓީމު ބައްދަލުކޮށް ބާސާ މޮޅުވީ 5-2 އިން ނަމަވެސް، މި ފަހަރުގެ މެޗު ފެނިގެންދިޔައީ މާ ވާދަވެރިކޮށެވެ.
ކިންގް އަބްދުﷲ ސްޕޯޓް ސިޓީގެ އަލިންމަ ބޭންކް ސްޓޭޑިއަމްގައި ކުޅުނު މި މެޗުގެ ފުރަތަމަ ލީޑް ނެގީ ބާސާ އިންނެވެ. އެއީ މެޗުގެ 36 ވަނަ މިނިޓުގައި ރަފީނިއާ ޖެހި ލަނޑަކުންނެވެ. އޭގެ ފަހުން ލަމީން ޔަމާލް ފޮނުވާލި ނުރައްކާތެރި ހަމަލާއެއް ރެއާލްގެ ކީޕަރު ކޯޓުއާ ވަނީ ދިފާއުކޮށްފަ އެވެ.
ފުރަތަމަ ހާފުގެ އިތުރު ވަގުތުގެ ތެރޭގައި ވިނީޝިއުސް ޖޫނިއާ ރެއާލަށް ނަތީޖާ ހަމަހަމަކޮށްދިން ނަމަވެސް، އޭގެ ކުޑަވަގުތުކޮޅެއް ފަހުން ރޮބަޓް ލެވަންޑޯސްކީ ވަނީ އަލުން ބާސެލޯނާއަށް ކުރިހޯދައިދީފަ އެވެ. އެހެންނަމަވެސް، ފުރަތަމަ ހާފު ނިމުމުގެ ކުރިން ގޮންޒާލޯ ގާސިއާ ވަނީ ރެއާލަށް ދެވަނަ ފަހަރަށް ނަތީޖާ އެއްވަރުކޮށްދީފަ އެވެ.
މެޗުން ބާސެލޯނާ މޮޅުވި ލަނޑު 73 ވަނަ މިނިޓުގައި ކާމިޔާބުކޮށްދިނީ ރަފީނިއާ އެވެ. މިއީ އޭނާ މެޗުގައި ޖެހި ދެވަނަ ލަނޑެވެ.
މެޗުގެ ފަހުކޮޅު ނަތީޖާ ހަމަހަމަކުރަން ރެއާލުން ގިނަ މަސައްކަތްތަކެއް ކުރި ނަމަވެސް ކާމިޔާބެއް ނުވިއެވެ. ބާސެލޯނާއިން މެޗު ނިންމާލީ އެމްބާޕޭއަށް ކުރި ފައުލަކާ ގުޅިގެން ފްރެންކީ ޑި ޔޯންއަށް ދެއްކި ރަތް ކާޑާއެކު އެއް ކުޅުންތެރިއަކު މަދުކޮށެވެ.
