ސަރުކާރުން ފަށަން ހަމަޖެހިފައިވާ ޓެކްސީ ލައިންގެ ހިދުމަތަށް ޑްރައިވަރުން ވަޒީފާ އަށް މީހުން ނެގުމަށްޓަކައި ހުޅުވާލި ފުރުސަތުގެ މުއްދަތު ހަމަވެ އިންޓަވިއު ކުރުން އަންނަ ހޮނިހިރު ދުވަހަށް ތާވަލުކޮށްފި އެވެ.
ޓެކްސީ ޑްރައިވަރުންގެ ދަފްތަރުގައި ރަޖިސްޓްރީ ވުމަށް ޓްރާންސްޕޯޓް މިނިސްޓްރީ މެދުވެރިކޮށް ސަރުކާރުން ހުޅުވާލީ 2024 ވަނަ އަހަރުގެ ފެބްރުއަރީ މަސްތެރޭގަ އެވެ. ޓެކްސީ ޑްރައިވަރުން ނެގުމުގައި މި ދަފްތަރުގައި ތިއްބެވި ފަރާތްތަކަށް އިސްކަންދޭނެ އެވެ.
ޓެކްސީ ދަފްތަރެއް އެކުވާލުމަކީ ރައީސް ޑރ. މުޢިއްޒުގެ ރިޔާސީ ވައުދެކެވެ. މީގެ މައިގަނޑު މަގްސަދަކީ ސަރުކާރުން ހުޅުވާލާ ސޯޝަލް ހައުސިން ފުރުސަތުތަކާއި އަދި އެހެނިހެން ފުރުސަތުތައް ވެސް އެ ފަރާތްތަކަށް ފަހިވާނެ ގޮތަކަށް ހެދުން ކަމަށް ރައީސް ވަނީ ވިދާޅުވެފަ އެވެ. އަދި މީގެ ޓެކްސީ ހިދުމަތުގައި ހުރި މައްސަލަތައް ހައްލުކުރުމަށް ކަމަށް ސަރުކާރުން މައުލޫމާތު ދެ އެވެ.
Advertisement
ހޮނިހިރު ދުވަހު ބޭއްވުމަށް ހަމަޖެހިފައިވާ އެ ފަރާތްތަކުގެ އިންޓަވިއުއަކީ ވޯކިން އިންޓަވިއުތަކެކެވެ. މި އިންޓަވިއު ކުރިއަށްގެންދާނީ ޓެކްސީ ހިދުމަތް ކުރިއަށް ގެންދިއުމަށް ހަވާލުކޮށްފައިވާ އެމްޓީސީސީ އިންނެވެ. މި އިންޓަވިއު އޮންނާނީ މާފަންނު ބަސް ޓާމިނަލުގަ ހެނދުނު 10:00 ގައެވެ.
ސަރުކާރުން މީގެ ކުރިން ބުނެފައިވަނީ މިދިޔަ އަހަރު ޓެކްސީ ލައިންގެ ހިދުމަތް ފައްޓަވާނެ ކަމަށެވެ. ނަމަވެސް އެކި ސަބަބުތަކާ ހެދި އެ މަސައްކަތް މިހާރު ވަނީ ފަސްކުރެވިފަ އެވެ. މި ހިދުމަތް އަންނަ ފެބްރުއަރީ މަސްތެރޭ ފެށޭނެ ކަމަށް ރައީސް ވަނީ ވިދާޅުވެފަ އެވެ.
މި ހިދުމަތަށް މުޅި ޖުމްލަ 407 ޑްރައިވަރުން ވަޒީފާ އަށް ނަގާނެ އެވެ. އެއީ ފުލްޓައިމް 285 މީހަކާއި ޕާޓްޓައިމް 112 މީހުންނެވެ.
