ރާއްޖޭގައި ވަޒީފާ އަދާކުރާ ބިދޭސީން ރާއްޖެއިން ބޭރަށް ދަތުރުކުރުމުގެ ކުރިންނާއި، އެނބުރި ރާއްޖެ އައުމުގެ ކުރިން މުއްދަތު ހަމަނުވާ "އީ-ވިސާ" އެއް އޮތްކަން ކަށަވަރުކުރުމަށް މޯލްޑިވްސް އިމިގްރޭޝަނުން އަންގައިފި އެވެ.
ރާއްޖެއިން އީ-ވިސާގެ ހިދުމަތް ފުރަތަމަ ތައާރަފްކޮށް މި ހިދުމަތް ދޭން ފަށާފައިވަނީ މިދިޔަ އަހަރުގެ ނޮވެމްބަރު މަހުގެ 10 ވަނަ ދުވަހު އެވެ. އިމިގްރޭޝަނުން ބުނީ، ބިދޭސީންނަށް ދޫކުރާ ވިސާގެ ހިދުމަތްތައް އޮންލައިންކޮށް އީ-ވިސާ ތައާރަފްކުރުމާ ގުޅިގެން، މިދިޔަ އަހަރުގެ ނޮވެމްބަރު 23 އިން ފެށިގެން ވިސާ ދޫކުރުމުގެ އުސޫލުތަކަށް ބަދަލުތަކެއް އައިސްފައިވާ ކަމަށެވެ.
އައު އުސޫލުގެ ދަށުން ވޯކް ޕާމިޓް އޮންނަ ބިދޭސީއެއްގެ ޕާސްޕޯޓުގައި މުއްދަތު ހަމަނުވާ ވޯކް ވިސާ ސްޓިކާއެއް އޮތް ނަމަވެސް ރާއްޖެއިން ފުރުމާއި އެތެރެވުމުގެ ހުއްދަ ދެވޭނީ ސައްހަ އީ-ވިސާއެއް އޮވެގެންނެވެ. އަދި އަލަށް ވަޒީފާއަށް އަންނަ ބިދޭސީންނަށް ރާއްޖެ އެތެރެވުމުގެ ހުއްދަ ލިބޭނީ ދާހިލީ ސަލާމަތާއި ފަންނިއްޔާތާ ބެހޭ ވުޒާރާއިން ދޫކޮށްފައިވާ މުއްދަތު ހަމަނުވާ "އެންޓްރީ ޕާސް" އެއް އޮނަންވާނެކަމަށް އިމިގްރޭޝަނުން ފާހަގަކުރި އެވެ.
Advertisement
އިމިގްރޭޝަނުން އިތުރަށް ބުނީ، ސިސްޓަމްގެ ތެރެއިން އޮޓަމެޓިކުން އީ-ވިސާއަށް ބަދަލުވާއިރު އެ ވިސާގެ މުއްދަތު އޮތްތޯ ބެލުމަކީ އެކްސްޕެޓް އޮންލައިން ސިސްޓަމުގައި ރަޖިސްޓްރީވެފައިވާ ވަޒީފާދޭ ފަރާތުގެ ޒިންމާއެއްކަމަށެވެ. ވޯކް ވިސާ ސްޓިކާގައި މުއްދަތު އޮތަސް، އީ-ވިސާގެ މުއްދަތު ހަމަވެފައިވާނަމަ ދަތުރުކުރުމުގައި ދަތިތަކާ ކުރިމަތިވާނެކަމަށް އިމިގްރޭޝަނުން ބުންޏެވެ.
އެގޮތުން، ބިދޭސީންގެ އީ-ވިސާގެ ސައްހަކަން އިމިގްރޭޝަންގެ ރަސްމީ ވެބްސައިޓް www.immigration.gov.mv/visa/status މެދުވެރިކޮށް މިހާރު ކަށަވަރު ކުރެވޭނެކަމަށާއި ދަތުރުގެ އިންތިޒާމުތައް ހަމަޖެއްސުމުގެ ކުރިން މިކަންކަން ޗެކްކުރުމަށް އިމިގްރޭޝަނުން ވަނީ އިލްތިމާސްކޮށްފަ އެވެ.
