ސޯޝަލް މީޑިއާ ޕްލެޓްފޯމް އެކްސް އާއި ގުޅިފައިވާ އާޓިފިޝަލް އިންޓެލިޖެންސް ޗެޓްބޮޓެއް ކަމަށްވާ ގްރޮކް އަށް ވަނުން ވަގުތީ ގޮތުން އިންޑޮނޭޝިއާއިން މަނާކޮށްފި އެވެ.
އެގައުމުގެ ސަރުކާރުން ބުނީ އެ ނިންމުން ނިންމީ އޭއައިގެ ބޭނުން ނަހަމަގޮތުގައި ހިފައި ޖިންސީ ކޮންޓެންޓް އުފައްދާފާނެ ކަމުގެ ކަންބޮޑުވުންތަކުގެ ސަބަބުން ކަމަށާއި އޭގެ ތެރޭގައި ފާޅުކަން ބޮޑު ތަސްވީރާއި މީހެއްގެ ރުހުމެއް ނެތި އުފައްދާފައިވާ ޑީޕްފޭކް މެޓީރިއަލް ހިމެނޭ ކަމަށެވެ.
އޮފިޝަލުން ހާމަކުރާ ގޮތުގައި މިގޮތަށް ނިންމީ އާއްމު ރައްޔިތުން، ހާއްސަކޮށް އަންހެނުންނާއި ކުޑަކުދިން ރައްކާތެރިކުރުމުގެ ގޮތުން ކަމަށެވެ. ގްރޮކް ފަދަ އެއައި ޓޫލްތައް ނަހަމަގޮތުގައި ބޭނުންކޮށްގެން ފޭކް އިމޭޖް، ޑީޕްފޭކް ނުވަތަ އަނެކާއަށް ގެއްލުން ލިބިދާނެފަދަ ތަކެތި އުފެއްދިދާނެތީ ކަމާބެހޭ ފަރާތްތަކުން ކަންބޮޑުވެ އެވެ.
އިންޑަނޭޝިއާގެ މިނިސްޓްރީ އޮފް ކޮމިއުނިކޭޝަން އެންޑް ޑިޖިޓަލް އެފެއާޒުން ބުނީ ގްރޮކް މަނާކުރުމަކީ ވަގުތީ ކަމެއް ކަމަށާއި އެއީ ދާއިމީ ކަމެއް ނޫން ކަމަށެވެ. ސަރުކާރުގެ މަންދޫބުން ރާވާފައި ވަނީ އެކްސް އާއި ގްރޮކްގެ ފަހަތުގައިވާ ކުންފުންޏާ އެކު މަޝްވަރާކޮށް ސޭފްޓީ ކޮންޓްރޯލްތައް ހަރުދަނާކޮށް ކޮންޓެންޓް މޮޑެރޭޝަންއާ ބެހޭ ގޮތުން ސާފު އުސޫލުތަކެއް އެކުލަވާލުމަށް އެދުމެވެ.
އޮންލައިން އަދި ޑިޖިޓަލް ކޮންޓެންޓާ ބެހޭ ގޮތުން އިންޑޮނޭޝިއާގައި ހަރުކަށި ގާނޫނުތަކެއް ހަދާފައިވާއިރު މީގެ ކުރިން ވެސް އިންޑޮނޭޝިއާ އިން ވަނީ ބައެއް ޕްލެޓްފޯމްތަކާ މެދު މިފަދަ ފިޔަވަޅުތަކެއް އަޅާފަ އެވެ. އާޓިފިޝަލް އިންޓެލިޖެންސް ކުރިއަރަމުންދާ ގޮތާއި، އެ އިންޓެލިޖެންސް ރައްޔިތުން ބޭނުން ކުރަމުންދާ ގޮތް އެގައުމުގެ ސަރުކާރުން ދަނީ ވަރަށް ގާތުން ބަލަމުންނެވެ.
ގްރޮކް ފަދަ އޭއައި އެޕްލިކޭޝަން ނުވަތަ ސައިޓުތައް ބޭނުންކޮށްގެން މީހުންގެ އަބުރު ހުތުރުވާ ގޮތަށް ފޮޓޯ/ވީޑިއޯ ހަދަމުންދާތީ އެކަމުގެ ނުރުހުން ވަރަށް ގިނަ ފަރާތްތަކުން ދަނީ ފާޅުކުރަމުންނެވެ.
