ވިޔަފާރިތަކަށް ދެވޭ ހިދުމަތްތައް ހަރުދަނާ ކުރެވޭނީ ސީދާ ވިޔަފާރިވެރިންނާ ވާހަކަ ދެކެވި، ކުރިމަތިވާ މައްސަލަތައް ދެނެގަނެވިގެން ކަމަށާއި އެހެންކަމުން ކުދި ވިޔަފާރިތަކާއެކު ސިލްސިލާ ބައްދަލުވުންތަކެއް ބާއްވަމުން ގެންދަވާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
އޮތެންޓިކް މޯލްޑިވްސްގެ ހަވަނަ އަހަރީ ދުވަސް ފާހަގަކުރަން ބޭއްވި ހަފްލާގައި ވާހަކަ ދައްކަވަމުން މިނިސްޓަރު ސައީދު ވިދާޅުވީ ދެމެހެއްޓެނިވި އިގުތިސާދީ ކުރިއެރުމަށް، ވިޔަފާރިތަކުގެ އަޑުއެހުމަށް ސިލްސިލާ ޑައިލޮގް ބައްދަލުވުންތަކެއް ކުރިއަށް ގެންދިއުން މުހިންމު ކަމަށެވެ. އަދި ވިޔަފާރިތަކަށް ދެވޭ ހިދުމަތްތައް ހަރުދަނާ ކުރެވޭނީ ސީދާ ވިޔަފާރިވެރިންނާ ވާހަކަ ދެކެވި، ކުރިމަތިވާ މައްސަލަތައް ދެނެގަނެވިގެން ކަމަށާއި އެކަން ކުރެވޭނީ ގަވާއިދުން ބައްދަލުވުންތައް ބާއްވައި ހިޔާލު ހޯދައިގެން ކަމަށް މިނިސްޓަރު ވިދާޅުވި އެވެ.
އެހެންކަމުން 2026ވަނަ އަހަރާއި 2027ވަނަ އަހަރު، ކުދި ވިޔަފާރިތަކަށް ލުއިތަކެއް ދޭން ރައީސުލްޖުމްހޫރިއްޔާ ނިންމަވާފައިވާ ނިންމެވުމާއެކު، ކުދި ވިޔަފާރިތަކާއެކު ބައްދަލުވުންތަކެއް ބާއްވަމުން ގެންދަވާނެ ކަމަށް މިނިސްޓަރު ސައީދު ވިދާޅުވި އެވެ.
ވިޔަފާރިތަކަށް ފަހި ފުރުސަތުތައް ފަހިކޮށްދިނުމަށް މިދިޔަ އަހަރުވެސް ސަރުކާރުން ވަނީ ގިނަ ލުއިތަކެއް ދީފަ އެވެ.
ވިޔަފާރިވެރިންގެ ކަންބޮޑުވުންތައް އަޑު އަހައި އެ ކަންބޮޑުވުންތަކަށް ހައްލު ހޯދައިދިނުމުގެ މަގުސަދުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މިދިޔަ ޑިސެމްބަރު މަހު ދިވެހި ވިޔަފާރިވެރިންނާއެކު ދިގު ބައްދަލުވުމެއް ބާއްވާފަ އެވެ. އެ ބައްދަލުވުމުގައި ބައެއް ވިޔަފާރިވެރިން ހިއްސާކުރި ކަންބޮޑުވުންތަކާއެކު ރައީސް ވަނީ އެމްއޭސީއެލްގައި ކަސްޓަމްސް އިން މުދާ ކްލިއާ ކުރުން 24 ގަޑިއިރަށް ބަދަލުކޮށް ކްލިއާކުރަން ދޭ މުއްދަތުވެސް އިތުރުކޮށްދެއްވާފަ އެވެ.
