ރާއްޖޭގައި މިވަގުތު ތިބި ހާފިޒުންގެ އަދަދު 291 އަށް އަރާފައިވާ ކަމަށް އިސްލާމިކް މިނިސްޓަރު ޑރ. ޝަހީމް އަލީ ސައީދު ވިދާޅުވެއްޖެ އެވެ.
އިސްލާމިކް މިނިސްޓްރީގެ މީޑިއާ ވަޓްސްއެޕް ގްރޫޕުގައި މިނިސްޓަރު ޝަހީމް ހިއްސާކުރެއްވި މެސެޖެއްގައި ވިދާޅުވެފައިވަނީ ހާފިޒުންގެ އަދަދު އިތުރު ކުރުމަށް ފަށާފައިވާ މަސައްކަތުގެ ތެރެއިން މިވަގުތު އަމާޒަކީ އަންނަ ރަމަޟާން މަހުގެ ކުރިން އެ އަދަދު 300 އަށް އެރުވުން ކަމަށެވެ.
ރާއްޖޭގައި ހާފިޒުން އިތުރުކުރުމަށްޓަކައި އެކަމަށް ހާއްސަ ތަމްރީނު ޕްރޮގްރާމްތަކެއް ރާއްޖޭގެ އެކި ކަންކޮޅުތަކުގައި ކުރިއަށް ގެންދަނީ ގުރުއާނަށް ލޯބިކުރާ ޖީލެއް އުފެއްދުމުގެ މަގްސަދުގަ އެވެ. ހާފިޒުންގެ އަދަދު އިތުރު ކުރުމަށްޓަކައި އެކަމަށް ހިތްވަރު ދިނުމުގެ ގޮތުން ރައީސުލްޖުމްހޫރިއްޔާ ވަނީ އެ ފަރާތްތަކަށް ހާއްސަ އެލަވަންސެއް ދޭން މީގެ ކުރިން ނިންމާފަ އެވެ. އަދި އެ އެލަވަންސް މިދިޔަ އަހަރު ވަނީ ބޮޑު ކޮށްފަ އެވެ.
ނިމިދިޔަ އަހަރު ރާއްޖޭގައި އަލަށް ހާފިޒުން ދަސްވެނިވުމަށް ހާއްސަ ހަފްލާއެއް ބާއްވާފަ އެވެ. ސަރުކާރުގެ އަމާޒަކީ ކޮންމެ އަހަރެއްގައިވެސް އެ ހަފްލާ މެދުނުކެނޑި ބޭއްވުމެވެ.
އަންނަ މަހު ފަށާ މި އަހަރުގެ ރަމަޟާން މަހުގެ ކުރިން އިތުރު 30 ހާފިޒުން ދަސްވެނިވާނެ ކަމަށް ވެސް މިނިސްޓަރު މައުލޫމާތު ދެއެވެ. އަދި ސަރުކާރުގެ އަމާޒަކީ މި ފަސް އަހަރު ތެރޭ ހާފިޒުންގެ އަދަދު 500 އަށް އެރުވުން ކަމަށް މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ ރާއްޖޭގެ އެކި ކަންކޮޅުތަކުގައި މިވަގުތު 1500 އަށްވުރެ ގިނަ ފަރާތްތަކުން ގުރުއާން ހިތުދަސްކުރަމުން ގެންދާ ކަމަށާއި މިއީ ތާރީހީ ގޮތުން ފާހަގަކޮށްލެވޭ އަދަދެއް ކަމަށެވެ.
