މި ފެށުނު ސްކޫލް ބަންދާ ދިމާކޮށް 7،000 އަށްވުރެ ގިނަ މީހުން އުމްރާއަށް ފުރާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު ޝަހީމް މިކަން ހާމަކުރެއްވީ ސޯޝަލް މީޑިއާގައި ހިއްސާކުރެއްވި ޕޯސްޓެއްގަ އެވެ. މިނިސްޓަރު ވިދާޅުވި ގޮތުގައި، މި ޑިސެމްބަރު މަހާއި އަންނަ ޖެނުއަރީ މަހު ރާއްޖެއިން ޖުމްލަ 7،726 މީހުން އުމްރާގެ އަޅުކަން އަދާކުރަން މައްކާއަށް ފުރާނެ ކަމަށެވެ. އަދި މި ހަފްތާގެ ތެރޭގައި އުމްރާވެރިން މައްކާއަށް ފުރަން ފަށާނެ ކަމަށްވެސް މިނިސްޓަރު ކުރެއްވި ޕޯސްޓުގައި ވިދާޅުވި އެވެ.

ސްކޫލް ބަންދާ ދިމާކޮށް އުމްރާއަށް ދާ އެންމެ ފުރަތަމަ ގްރޫޕް މައްކާއަށް ފުރާފައިވަނީ މި މަހުގެ 21 ވަނަ ދުވަހު އެވެ. އެ ދުވަހު ޖުމްލަ 262 އުމްރާވެރިން އުމްރާއަށް ވަނީ ފުރައިފަ އެވެ.

އެންމެ ގިނަ އުމްރާވެރިން ފުރަން ހަމަޖެހިފައިވަނީ، މިމަހުގެ 28 ވަނަ ދުވަހު އެވެ. އެ ދުވަހު އެކަނިވެސް ޖުމްލަ 1،049 އުމްރާވެރިން މައްކާއަށް ފުރުމަށް ހަމަޖެހިފައިވާއިރު އުމްރާއަށް ފުރާ އެންމެފަހު ގްރޫޕް ފުރަން ހަމަޖެހިފައިވަނީ، އަންނަ ޖެނުއަރީ މަހުގެ ނުވަ ވަނަ ދުވަހު އެވެ. އެ ދުވަހު 298 އުމްރާވެރިން އުމްރާއަށް ފުރުމަށް ވަނީ ހަމަޖެހިފަ އެވެ.

ސްކޫލް ބަންދާ ދިމާކޮށް ކޮންމެ އަހަރަކުވެސް ގިނަ އަދަދެއްގެ ބަޔަކު އުމްރާގެ އަޅުކަން އަދާކުރުމަށް ފުރާތީ އުމްރާވެރިންގެ ކަންކަން ވީހާވެސް އޮމާންކޮށް ގެންދިއުމަށްޓަކައި ކަމާބެހޭ އިދާރާތަކުން އަންނަނީ މަސައްކަތް ކުރަމުންނެވެ.