ބޭންކް އޮފް މޯލްޑިވްސް އިން ހުޅުމާލޭ ދެވަނަ ފިޔަވަހީގައި ދެ އޭޓީއެމް ބަހައްޓައި، ހިދުމަތް ދޭން ފަށައިފިއެވެ.

މީގެ ތެރެއިން އެއް އޭޭޓީއެމް ސެންޓަރު ގާއިމުކޮށްފައިވަނީ ހިޔާގެ ހަވަނަ ޓަވަރާއި ހަތްވަނަ ޓަވަރުގެ މެދުގައެވެ. ދެވަނަ އޭޓީއެމް ސެންޓަރު ގާއިމުކުރީ ސްޓެލްކޯ ފްލެޓުތައް ކައިރީގައެވެ. ސްޓެލްކޯ ފްލެޓުތައް ކައިރީގައި ގާއިމުކޮށްފައިވަނީ ޑޮލަރު އޭޓީއެމް ސެންޓަރެކެވެ.

މި އޭޓީއެމް ތަކުގެ ހިދުމަތް ރަސްމީކޮށް ފެށުމަށް ހާއްސަ ރަސްމިއްޔާތެއް މިއަދު ވަނީ ބާއްވާފައެވެ. މި ރަސްމިއްޔާތުގައި އޭޓީއެމްގެ ހިދުމަތް ރަސްމީކޮށް ފައްޓަވާދެއްވީ އިކޮނޮމިކް މިނިސްޓަރު މުހައްމަދު ސައީދު އެވެ. މި ރަސްމިއްޔާތުގައި ބީއެމްއެލްގެ އިސްވެރިން ބައިވެރިވެ ވަޑައިގެންނެވިއެވެ.

ބީއެމްއެލް އިން ބުނިގޮތުގައި ދެވަނަ ފިޔަވަހީގައި އަލަށް ބެހެއްޓި މި އޭޓީއެމްތަކުން އަމިއްލަ ފަރުދުންނާއި ވިޔަފާރިތަކަށް 24 ގަޑިއިރު ފައިސާ ނެގުމާއި ޖަމާކުރުމުގެ އިތުރުން، ބިލަށް ފައިސާ ދެއްކުމާއި ޓްރާންސްފާ ކުރުމުގެ ހިދުމަތް ލިބޭނެއެވެ.

^{ހިޔާ ޓަވަރު ސަރަހައްދުގައި އަލަށް ގާއިމުކުރި އޭޓީއެމްތައް، އިކޮނޮމިކް މިނިސްޓަރު ސައީދު ހުޅުވައިދެއްވަނީ---ފޮޓޯ:ބީއެމްއެލް}

"މުޅި ރާއްޖެއަށް ބީއެމްއެލް އޭޓީއެމް" މަޝްރޫއުގެ ދަށުން އެންމެ ފުރަތަމަ އޭޓީއެމް ގާއިމުކޮށްފައި ވަނީ މި އަހަރުގެ ފެބްރުއަރީ މަހުގައެވެ. އަދި އެންމެ 9 މަސް ދުވަސް ތެރޭގައި، ބޭންކުން ވަނީ ރާއްޖޭގެ 20 އަތޮޅުގެ 105 ރަށެއްގައި އޭޓީއެމް ގާއިމުކޮށްފައެވެ.

މި މަޝްރޫއުގެ ބޮޑުކަމާއެކުވެސް މަސައްކަތް ނިންމާލި އަވަސްމިނަކީ މިހާތަނަށް ރާއްޖެ ނުދެކޭފަދަ ކާމިޔާބީއެއްގެ ގޮތުގައި ބީއެމްއެލުން ސިފަކުރެއެވެ. އަދި މި މަސައްކަތް ނިންމާފައިވަނީ އެންމެ މަތީ ފެންވަރުގައި، ވީހާވެސް އަވަހަށް ޚިދުމަތް ދިނުމަށްޓަކައި، ގިނަ ފަރާތްތަކެއްގެ ބައިވެރިވުމާއެކު، ވަރަށް ގިނަ މަސައްކަތްތަކެއް ފުރިހަމަ ކޮށްގެންނެވެ.

މި މަޝްރޫއު ހިންގުމުގައި ޚަރަދު ކުޑަކުރުމާއި މަޝްރޫއުގެ ހިންގުން ހަރުދަނާވުމުގެ ނަތީޖާއެއްގެ ގޮތުން، މީގެ ކުރިން ބޭންކުން އޭޓީއެމް ޤާއިމުކުރުމަށް ކޮށްފައިވާ ޚަރަދާ އަޅައިބަލާއިރު، %33 ޚަރަދު ކުޑަކަންވެސް އެ ބޭންކުން ފާހަގަކުރެއެވެ.