އިއްޔެ އެކަނިވެސް 10 މަސާޖު ޕާލާއެއް ބަލައިފާސްކޮށް، ގަވާއިދާ ހިލާފަށް އެ ތަންތަނުގައި މަސައްކަތް ކުރަމުން ދިޔަ ހަތަރު ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފި އެވެ.

މިކަމާ ގުޅިގެން އިމިގްރޭޝަނުން އެކްސްގައި ހިއްސާކުރި ޕޯސްޓެއްގައި ބުނީ، ސްޕާ އަދި ސެލޫން ފަދަ ތަންތަނުގައި ގަވާއިދާ ހިލާފަށް މަސައްކަތް ކުރާ ބިދޭސީންނަށް އަމާޒުކޮށްގެން އިމިގްރޭޝަނުގެ ޓާސްކްފޯސްއިން ކުރިއަށްގެންދާ އޮޕަރޭޝަނުގައި މާލޭގައި ހިންގަމުންދިޔަ 10 ތަނެއް ބަލައި ފާސްކުރުމަށް ފަހު، ހަތަރު ބިދޭސީއަކު އިމިގްރޭޝަންގެ ބެލުމުގެ ދަށަށް އިއްޔެ ގެންގޮސްފައިވާ ކަމަށެވެ.

މަސާޖު ޕާލާއެއް ހިންގަމުން އައި ވިޔަފާރިއެއް ބަންދުކުރި ކަމުގެ ނޯޓިސް ހަރުކުރާ މަންޒަރު އިމިގްރޭޝަނުން ކޮށްފައިވާ ޕޯސްޓުގައި ފެނެ އެވެ.

ގަވާއިދާ ހިލާފަށް މިފަދަ ތަންތަނުގައި މަސައްކަތް ކުރަމުންދިޔަ ބިދޭސީންތަކެއް އިމިގްރޭޝަނުގެ ބެލުމުގެ ދަށަށް ގެންގޮސްފައިވާއިރު، މިފަދަ ތަންތަނުގައި ހިންގަމުންދާ ވިޔަފާރި ވަގުތުން ހުއްޓުވުމުގެ ފިޔަވަޅުތައް އިކޮނޮމިކް މިނިސްޓްރީން އަންނަނީ އަޅަމުންނެވެ. މި އޮޕަރޭޝަންތަކަކީ އިކޮނޮމިކް މިނިސްޓްރީއާއި އިމިގްރޭޝަންގެ ޓާސްކްފޯސް ގުޅިގެން ކުރިއަށްގެންދާ އޮޕަރޭޝަންތަކެކެވެ.

މާލޭގައި މަސާޖު ޕާލާތައް ގިނަކަމުގެ ޝަކުވާ ގިނަ ބަޔަކު ކުރަމުން އަންނަނީ ކުރަމުންނެވެ. ވަކިން ހާއްސަކޮށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލޭގެ ރައްޔިތުންނާ ބައްދަލުކުރެއްވުމަށް ބާއްވާ ޖަލްސާތަކުގައި ބައެއް ފަރާތްތަކުން އަންނަނީ މިކަމާ މެދު ކަންބޮޑުވުން ފާޅުކުރަމުންނެވެ. މިކަމާ ގުޅިގެން ރައީސް ޑރ. މުއިއްޒު ވިދާޅުވީ، ހަފުތާއެއް ތެރޭގައި މާލެއިން 52 މަސާޖު ޕާލާއެއް ބަންދުކޮށްފައިވާ ކަމަށެވެ.