މިރޭ އިރާއިކޮޅު އޮސްޓްރޭލިއާގެ ސިޑްނީގެ ބޮންޑީ ބީޗުގައި ބަޑިން ޙަމަލާދީ 16 މީހުން މަރާލައި އެތައް ބަޔަކު ޒަޚަމްކުރި ނުރައްކާތެރި ޙަމަލާ ދިން މީހާ އާއި ކުރިމަތިލައި އޭނާގެ އަތުން ބަޑި އަތުލި ހިތްވަރުގަދަ އަޙްމަދު އަލް-އަޙްމަދަކީ “އޮސްޓްރޭލިއާގެ އެތައް ރައްޔިތުންނެއް ސަލާމަތްކޮށްލި ބަޠަލު” ކަމަށް ބުނެ އެ ޤައުމުގެ މީޑިއާއިންނާއި ބޭރުގެ މީޑިއާތަކުން ބުނަން ފަށައިފިއެވެ.

ވީޑިއޯ އިން ފެންނަ ގޮތުގައި ދެމީހަކު ބަޑި ހިފައިގެން ޙަމަލާ ދެމުން ދިޔައެވެ. ބަޑި ހިފައިގެން ހުރި އެކަކާއި އަޙްމަދު އަލް-އަޙްމަދު ކުރިމަތިލައި އޭނާގެ އަތުން ބަޑި އަތުލައި އޭނާ އަށް ހަމަ އެ ޑިން ބިރު ދައްކާ މަންޒަރު ފެނެއެވެ.

“އޭނާ ވަރަށް ބާރަށް ދުވެފައި ޙަމަލާދިން މީހާ އާއި ދިމާއަށް ގޮސް އެޓޭކް ކުރިއިރު ވެސް އެ މީހާ ދިޔައީ ބަޑި ޖަހަމުންނެވެ. ނަމަވެސް އުންޑައަކަށް ބެލުމެއް ނެތި ފުރާނަ އަތަށްލައިގެން އަޙްމަދު އަލް-އަޙްމަދު އެ މީހާ އާއި ކުރިމަތިލައި އޭނާގެ އަތުން ބަޑި އަތުލައި އެތައް ބައެއްގެ ފުރާނަ ސަލާމަތް ކޮށްލި” ކަމަށް އޮސްޓްރޭލިއާގެ ޚަބަރުތައް ބުނެއެވެ.

ރިޕޯޓްތައް ބުނާ ގޮތުގައި ބަޑި ޖެހި މީހާ އާއި ކުރިމަތިލުމުގެ ތެރޭގައި އަޙްމަދަށް ވެސް ވަނީ އަނިޔާވެގެން ހޮސްޕިޓަލުގައި ފަރުވާ ދޭން ފަށާފައެވެ.

އޮސްޓްރޭލިއާގެ ބޮޑުވަޒީރު އެންތޮނީ އަލްބަނީޒް ވަނީ އަޙްމަދު އަލް-އަޙްމަދުގެ ހިތްވަރަށް ތަޢުރީފު ކޮށްފައެވެ. މުޅި އޮސްޓްރޭލިއާގައި މިރޭ އަޙްމަދުގެ ވާހަކަތައް ފެތުރެމުންދާއިރު، އަޙްމަދުގެ ބޭބެ މުޞްޠަފާ އާއި ޙަވާލާދީ ޚަބަރުތައް ބުނާ ގޮތުގައި، ފުރުޓް ފިހާރައެއްގައި މަސައްކަތްކުރާ އަޙްމަދު އަލް-އަޙްމަދަކީ ދުވަހަކު ވެސް މިލިޓަރީ ޓްރޭނިންގ އެއް ހަދާފައިވާ މީހެއް ނޫނެވެ.

އަޙްމަދު އަލް-އަޙްމަދަށް ހޮސްޕިޓަލުގައި ފަރުވާ ދެމުންދާއިރު އޮސްޓްރޭލިއާގެ އެތައް ހާސް ބަޔަކު ދަނީ އޭނާ އަކީ ބަޠަލެއް ކަމަށް ބުނެ ހެޔޮ ދުޢާ ކުރަމުންނެވެ.

މިރޭ ދިމް ޙަމަލާ އަމާޒު ކޮށްފައި ވަނީ ޔަހޫދީންނަށް ކަމަށް ބައެއް މީޑިއާތަކުން ބުނަމުންދާއިރު، މި ޙަމަލާގައި މަރުވެ، އަނިޔާވި މީހުންގެ ތެރޭގައި މުސްލިމުން ވެސް ހިމެނެއެވެ.