އެމެރިކާ، އިނގިރޭސިވިލާތް އަދި އޮސްޓްރޭލިއާ ގުޅިގެން އުފައްދާފައިވާ އަސްކަރީ އިއްތިހާދު "އޭކަސް" ގެ ދަށުން، ކަނޑުއަޑީގައި ދުއްވާ ޑްރޯން ނުވަތަ 'އަންކްރޫޑް އަންޑަރސީ ވެހިކަލް' (ޔޫ.ޔޫ.ވީ) ޓެކްނޮލޮޖީ އުފެއްދުމަށް ނިންމައިފިއެވެ.

ސިންގަޕޫރުގައި ބޭއްވުނު ސަލާމަތީ ސަމިޓެއްގައި ތިން ގައުމުގެ ދިފާއީ ވަޒީރުން މިކަން އިޢުލާން ކުރެއްވީ، މި އިއްތިހާދުގެ މަސައްކަތްތައް ލަސްވަމުންދާ ކަމަށް ބުނެ އަމާޒުވަމުންދިޔަ ފާޑުކިޔުންތަކާ ގުޅިގެންނެވެ. އިނގިރޭސި ދިފާއީ ވަޒީރު ޖޯން ހީލީ ވިދާޅުވީ، އޭކަސްގެ ދަށުން މާ ގިނައިން ވާހަކަދެކެވި އަމަލީ މަސައްކަތް މަދުވެފައިވާ ކަމަށާއި، ނަމަވެސް މިހާރު އެކަން ބަދަލުވެފައިވާ ކަމަށެވެ.

މި މަޝްރޫޢުގެ ދަށުން އުފައްދާ ޑްރޯންތައް އަންނަ އަހަރުގެ ނިޔަލަށް ތައްޔާރުވާނެ ކަމަށް ބެލެވެއެވެ. މި މަޝްރޫޢަށް އިނގިރޭސިވިލާތުން އެކަނިވެސް 150 މިލިއަން ޕައުންޑް (201 މިލިއަން ޑޮލަރު) ޚަރަދުކުރުމަށް ވަނީ ނިންމާފައެވެ.

މި ޓެކްނޮލޮޖީގެ މައިގަނޑު ބޭނުމަކީ ކަނޑުއަޑީގައި އަޅާފައިވާ މުހިންމު ކޭބަލްތަކާއި ހޮޅިތައް ރައްކާތެރިކުރުމެވެ. މީގެ އިތުރުން، މި ޑްރޯންތައް ބޭނުންކޮށްގެން ކަނޑުއަޑީގެ އިންފްރާސްޓްރަކްޗަރ ބެލެހެއްޓުމާއި، ޖާސޫސީ މަޢުލޫމާތު އެއްކުރުމާއި، އަދި ހަމަލާ ދިނުމުގެ ގާބިލުކަންވެސް ތަރައްގީކުރެވޭނެއެވެ.

މި ނިންމުން އައިސްފައިވަނީ އިނގިރޭސިވިލާތުގެ އުތުރުގެ ކަނޑުތަކުގައިވާ ކޭބަލްތަކަށް ރަޝިޔާއިން ނުރައްކާކުރާ ކަމުގެ ތުހުމަތުތަކެއް ކުރެވިފައިވާ ދަނޑިވަޅެއްގައެވެ. އަދި ޓައިވާނާއި ސްވިޑަން ސަރަހައްދުގެ ކަނޑުއަޑީގެ ކޭބަލްތަކަށް ޗައިނާގެ އުޅަނދުތަކުން ގެއްލުންދޭ ކަމުގެ ތުހުމަތުތަކެއްވެސް ވަނީ ފެންމަތިވެފައެވެ.

2021 ވަނަ އަހަރު އުފެއްދި އޭކަސް އިއްތިހާދަކީ އިންޑޯ-ޕެސިފިކް ސަރަހައްދުގައި ޗައިނާގެ ބާރުގަދަވަމުންދިއުމާ ދެކޮޅަށް އުފެއްދި އިއްތިހާދެއްގެ ގޮތުގައި ގިނަ ބަޔަކު ދެކެއެވެ. މި އިއްތިހާދުގެ ދަށުން އޮސްޓްރޭލިއާއަށް ނިއުކްލިއަރ ސަބްމެރިން ފޯރުކޮށްދިނުމަށްވެސް ވަނީ ނިންމާފައެވެ.

އެމެރިކާގެ ދިފާއީ ވަޒީރު ޕީޓް ހެގްސެތު ވިދާޅުވީ، އޮސްޓްރޭލިއާއަށް ސަބްމެރިން ފޯރުކޮށްދިނުމުގެ މަޝްރޫޢުވެސް ތާވަލާ އެއްގޮތަށް ކުރިއަށްދާ ކަމަށެވެ. އަދި އޮސްޓްރޭލިއާގެ ދިފާއީ ވަޒީރު ރިޗަޑް މާލްސް ވިދާޅުވީ، 2027 ވަނަ އަހަރުގެ ނިޔަލަށް އޮސްޓްރޭލިއާގެ ހުޅަނގު އައްސޭރީގައިވާ އަސްކަރީ މަރުކަޒު ސަބްމެރިންތަކަށް ބޭނުންކުރެވޭނެ ވަރަށް ތައްޔާރުވާނެ ކަމަށެވެ.