ނ. މަނަދޫގައި އަލަށް އިމާރާތް ކުރެވުނު 700 މީހުންގެ ޖާގައިގެ މިސްކިތް ރަސްމީކޮށް ހުޅުވައިދެއްވައިފި އެވެ. މި މިސްކިތް ހުޅުވައި ދެއްވައިފައިވަނީ އިސްލާމިކް މިނިސްޓްރީގެ ސްޓޭޓް މިނިސްޓަރު އަލްއުސްތާޛް އަބްދުﷲ ސައުދާން އެވެ.
ދައުލަތުގެ ބަޖެޓުން ހަރަދުކޮށްގެން މި މަސައްކަތް ހަވާލުކޮށްފައިވަނީ އަފާމީ މޯލްޑިވްސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާ އެވެ.
މިއަހަރު އޮގަސްޓް މަހު ވެސް މަނަދޫގައި ވަނީ މިސްކިތެއް ހުޅުވާފަ އެވެ. ކުވެއިތުގެ ވިޔަފާރިވެރިޔަކު ކަމަށްވާ ތޮލާލް ހަލީފާ އަލް ޖެރީ ހަރަދުކޮށްގެން ނިންމައި ހުޅުވި މި މިސްކިތަށް ނަން ދީފައިވަނީ އެ ވިޔަފާރިވެރިޔާ "ޖެރީ" މި ނަމުންނެވެ. ބަނދަރު ސަރަހައްދުގައި އިމާރާތްކުރި އެ މިސްކިތަކީ 114 މީހުންގެ ޖާގައިގެ މިސްކިތެކެވެ.
Advertisement
މަނަދޫގައި މިސްކިތް ހުޅުވުމަށް ބޭއްވި ރަސްމިއްޔާތަށްފަހު، އެ ރަށުގައި މިނިސްޓްރީން ކުރިއަށް ގެންދިޔަ ޒަވާން ހަތީބުން ތަމްރީނު ކުރުމަށް ކުރިއަށް ގެންދިޔަ ޕްރޮގްރާމާއި ކަށުކަމާކެމީގެ ތަމްރީނު ޕްރޮގްރާމް ނިންމައި އެ ފަރާތްތަކަށް ވަނީ ސެޓްފިކެޓް ހަވާލުކޮށްފަ އެވެ.
ސެޓްފިކްޓް ހަވާލުކުމުގެ ރަސްމިއްޔާތުގެ ތެރެއިން: ފޮޓޯ: މިނިސްޓްރީ
ރާއްޖޭގެ އެކި ކަންކޮޅުތަކުގައި ގާއިމްކުރަމުންދާ މިސްކިތްތަކުގެ ތެރެއިން 15 މިސްކިތެއް އަންނަ ރަމަޟާން މަހުގެ ކުރިން ހުޅުވޭނެ ކަމަށް ރައީސް ވަނީ ވިދާޅުވެފަ އެވެ. އޭގެ ތެރޭގައި މާލޭގެ މިސްކިތަކާއި ހުޅުމާލެ ފޭސް 2 ގެ މިސްކިތެއްވެސް ހިމެނޭ ކަމަށް ރައީސް ވިދާޅުވި އެވެ. ފޭސް 2 ގެ މިސްކިތްތައް މަދުކަން ފާހަގަކުރައްވާ ރައީސް ވިދާޅުވީ އެ ސަރަހައްދުގައި ދާއިމީ އިތުރު މިސްކިތްތަކެއް ގާއިމްކުރުމުގެ މަސައްކަތް މި މަސްތެރޭ ފެށިގެންދާނެ ކަމަށެވެ.
