އޮސްޓްރޭލިއާގައި ކުޑަކުދިންނަށް ހާއްސަ ސޯޝަލް މީޑިއާ ޕޮލިސީއެއް އަންނަ ހަފުތާގައި ތައާރަފު ކުރަން ނިންމައިފި އެވެ. އޮސްޓްރޭލިއާ އަކީ ސޯޝަލް މީޑިއާއަށް މިފަދަ ހަރުކަށި ފިޔަވަޅުތަކެއް އެޅި ފުރަތަމަ ގައުމެވެ.

އޮސްޓްރޭލިއާގައި ޓިކްޓޮކް، ސްނެޕްޗެޓް، ޔޫޓިއުބް، ރެޑިޓް، އިންސްޓަގްރާމް، ފޭސްބުކް، ކިކް، ޓްވިޗް، ތްރެޑްސް އަދި އެކްސް ފަދަ ބޮޑެތި ޕްލެޓްފޯމްތަކުގައި 16 އަހަރުން ދަށުގެ ހުރިހާ ޔޫޒަރުން އެކައުންޓް ގެންގުޅުން މަނާ ކުރުމަށް އެގައުމުން ވަނީ ނިންމާފައެވެ. މި ބޭން އަށް އަމަލުކުރަން ފަށާނީ 10 ޑިސެމްބަރު 2025 އިން ފެށިގެންނެވެ.

ޓެކްނޮލޮޖީ ކުންފުނި މެޓާ އިން މިހާރު ވަނީ 16 އަހަރުން ދަށުގެ ކުދިން އިންސްޓަގްރާމް އަދި ފޭސްބުކް އިން ބަންދުކުރަން ފަށާފަ އެވެ.

އެހެން ޕްލެޓްފޯމްތަކުން ވަނީ އުމުރުން 16 އަހަރުން ދަށުގެ މީހުންގެ ފޮޓޯތަކާއި ކޮންޓެކްޓްތައް ޑައުންލޯޑް ކުރުމަށް ނަސޭހަތްތެރިވެ، 16 އަހަރު ފުރެންދެން އެކައުންޓްތައް ޑިލީޓް ކުރުމަށް ނުވަތަ ފްރީޒް ކުރުމުގެ ފުރުސަތު ދޭން ފަށައިފަ އެވެ. އޭގެ ތެރޭގައި ޓިކްޓޮކް، ސްނެޕްޗެޓް، ޔޫޓިއުބް، ރެޑިޓް، ޓްވިޗް، ކިކް، ތްރެޑްސް އަދި އެކްސް ހިމެނެ އެވެ.

އޮސްޓްރޭލިއާގެ އިންޓަނެޓް ރެގިއުލޭޓަރުން ބުނާ ގޮތުގައި އޮސްޓްރޭލިއާގެ 16 އަހަރުން ދަށުގެ ކުދިންގެ ތެރެއިން 96 ޕަސެންޓް ކުދިންނަކީ ސޯޝަލް މީޑިއާ އެކައުންޓްތައް ގެންގުޅޭ ކުދިންނެވެ.

އޮސްޓްރޭލިއާ ސަރުކާރުން ބުނާ ގޮތުގައި ސޯޝަލް މީޑިއާގެ އާ ގާނޫނުތަކަކީ މަސްތުވާތަކެއްޗާއި ސައިބާ ބުލީން ފަދަ ކަންކަމުން ކުޑަކުދިން ސަލާމަތް ކުރުމަށް ކޮންމެހެން ބޭނުންތެރި ގާނޫނެކެވެ.