އަތޮޅުތަކަށް ކުރެއްވި ދަތުރުފުޅުތައް ނިންމަވާލެއްވުމަށްފަހު މާލެ ސިޓީގެ އަވަށްތަކުގައި ދިރިއުޅޭ ރައްޔިތުންނާ ބައްދަލުކުރެއްވުމުގެ ގޮތުން މިރޭ މާފަންނުގައި ދިރިއުޅޭ ރައްޔިތުންނާ ރައީސުލްޖުމްހޫރިއްޔާ ބައްދަލުކުރައްވާނެ އެވެ.
ތާޖުއްދީން ސްކޫލުގެ ހޯލުގައި ބާއްވަން ހަމަޖެހިފައިވާ މި ބައްދަލުވުން އޮންނާނީ މިރޭ 08:30 ގަ އެވެ. މި ބައްދަލުވުމުގެ މައިގަނޑު ބޭނުމަކީ ރައްޔިތުންގެ އިހުސާސްތައް ދެނެގަނެ ފަރުދީގޮތުން ދިމާވެފައިވާ ގޮންޖެހުންތަކާއި ދާއިރާ ނުވަތަ އަވަށަށް ބޭނުންވާ ތަރައްގީއާއި ގޮންޖެހުންތައް ރައީސުލްޖުމްހޫރިއްޔާ އަށް ހިއްސާކުރުމެވެ. އަދި ރާއްޖޭގެ ތަރައްގީގެ ކަންކަމުގައި އުފެދޭ ސުވާލާއި އެހެނިހެން ސުވާލުތައް ރައީސުލްޖުމްހޫރިއްޔާއާ ކުރެއްވައި އޭގެ ޖަވާބު ހޯއްދެވުމެވެ.
ރައީސުލްޖުމްހޫރިއްޔާ އޮފީހުގެ ތަރުޖަމާނު ހީނާ ވަލީދު ވަނީ މި ބައްދަލުވުމަށް މާފަންނުގައި ދިރިއުޅޭ އެންމެހާ ރައްޔިތުންނަށް ދައުވަތު ދީފަ އެވެ.
މާލެ ސިޓީގެ އަވަށްތަކުގައި ދިރިއުޅޭ ރައްޔިތުންނާ ބައްދަލުކުރެއްވުމުގެ ގޮތުން ރައީސް އެންމެ ފުރަތަމަ ޒިޔާރަތްކުރީ މި ވިލިނގިއްޔަށެވެ. އަދި އެއަށްފަހު މައްޗަންގޯޅީގައި ދިރިއުޅޭ ރައްޔިތުންނާ ވެސް ބައްދަލުކުރެއްވި އެވެ. މާފަންނުގައި ދިރިއުޅޭ ރައްޔިތުންނާ ބައްދަލުކުރެއްވުމަށްފަހު ގަލޮޅު، ހެންވޭރު އަދި ހުޅުމާލެ ފޭސް-1 އާއި ފޭސް-2 ގައި ދިރިއުޅޭ ރައްޔިތުންނާ ވެސް ބައްދަލުކުރައްވާނެ ކަމަށް ބެލެވެ އެވެ.
މި ބައްދަލުވުންތަކުގައި ރައީސްގެ އަރިހަށް ރައްޔިތުން ހުށަހަޅާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަ އެވެ. ރައީސް ދަނީ އެ މައްސަލަ އެއްކޮށް ހައްލުކޮށްދެއްވާނެ ކަމަށް ވައުދުވެވަޑައިގަންނަވަމުންނެވެ.
މާލެ ސިޓީ އަށް ދިމާވެފައިވާ ބޯހިޔާވަހިކަމުގެ މައްސަލަ އަށް ދާއިމީ ހައްލެއް ގެނެސްދެއްވުމުގެ ގޮތުން ރައީސްގެ އެންމެ ބޮޑު ތަސައްވުރަކީ ރަސްމާލެ ހިއްކައި އެތަނުން ގޯތި ދިނުމެވެ. އެގޮތުން ކުރިއަށް އޮތް ފަސް މަސްތެރޭ ރަސްމާލޭގައި ހިއްކޭ ބިމުން މާލެ ރައްޔިތުންނަށް 15،000 ގޯތި ދެއްވާނެ ކަމަށް ރައީސް ވަނީ ވިދާޅުވެފަ އެވެ. ރަސްމާލެ ހިއްކުން އަވަސްކުރުމުގެ ގޮތުން ދުނިޔޭގައި އޮތް އެންމެ ބޮޑު ދެ ޑްރެޖަރުގެ ތެރެއިން ޑްރެޖަރެއް މި ހަފްތާގައި ވަނީ ރަސްމާލެ ހިއްކުމުގެ މަސައްކަތް ފަށައި އެ މަސައްކަތް ތިން ގުނަ ބާރު ކޮށްފަ އެވެ.
މީގެ އިތުރުން ހުޅުމާލޭގެ ފޭސް-3 ހިއްކުމުގެ މަސައްކަތް ވެސް ދަނީ ބާރުމިނުގައި ކުރިއަށެވެ. އެ ބިމުން ނިމިދިޔަ ސަރުކާރުން ދީފައިވާ ގޯތި ދެވޭނެ އެވެ. ރައީސް ވިދާޅުވީ އެ ބިން މިއަހަރުގެ ނިޔަލަށް ހިއްކައި ނިމޭނެ ކަމަށެވެ. ގިރާވަރުފަޅު ހިއްކަން ފަށާނީ ފޭސް-3 ހިއްކައި ނިމުނީމަ އެވެ. އެ ފަޅު ހިއްކައި ނިމޭނެ ކަމަށް ރައީސް ވިދާޅުވީ މާޗު މަހުގަ އެވެ.
