ހުޅުމާލެ ބާ އިންޖީނުގޭގައި މިދިޔަ ހަފްތާގައި ހިނގި ހިތާމަވެރި ހާދިސާގައި އަނިޔާ ލިބުނު ސްޓެލްކޯގެ މުވައްޒަފު އިތުރު ފަރުވާ ދިނުމަށްޓަކައި ތައިލަންޑުގެ ބެންކޮކަށް ފުރުވާލަިއިފި އެވެ.
ސްވިޗް ގިއަރަކަށް ދިމާވި މައްސަލައެއް ހައްލުކުރުމުގެ މަސައްކަތް ކުރަމުން ދަނިކޮށް ހިނގި މި ހާދިސާގައި މުވައްޒަފުގެ ހަށިގަނޑުގެ އެކި ތަންތަން ފިހި ސީރިއަސް އަނިޔާތަކެއް ލިބިފައިވެ އެވެ. ލިބުނު އަނިޔާތަކަށް ފަރުވާ ދިނުމަށް އެންމެ ފުރަތަމަ އޭނާ ގެންގޮސްފައިވަނީ ހުޅުމާލެ ހޮސްޕިޓަަލަށެވެ. އަދި ފަހުން ވަނީ އޭޑީކޭ އަށް ބަދަލުކޮށްފަ އެވެ.
ހުޅުމާލޭގެ ބައު އިންޖީނުގޭގެ މީޑިއަމް ވޯލްޓޭޖް ޕެނަލަކަށް ދިމާވި މައްސަލައަކާއި ގުޅިގެން މާލެއާއި ހުޅުމާލެއަށް ކަރަންޓު ދިނުމަށް ބޭނުންކުރާ ބައެއް ފީޑަރުތައް އޮފް ވެ ބައެއް ސަރަހައްދުތަކުން ވަނީ އެދުވަހު ކަރަންޓުގެ ހިދުމަތް މެދުކެނޑިފަ އެވެ. މުވައްޒަފަށް އަނިޔާ ލިބުނީ މި ހާދިސާގައި ހައްލުކުރަން އުޅުމުގެ ތެރޭގައި ކަމަށް ބެލެވެ އެވެ.
ހާދިސާ އަށް ފަހު ސްޓެލްކޯ އިން ނެރުނު ނޫސްބަޔާނެއްގައި ބުނެފައިވަނީ މިފަދަ ހާދިސާތައް ތަކުރާރުވިޔަ ނުދިނުމަށްޓަކައި އަޅަންޖެހޭ އެންމެހާ ފިޔަވަޅުތައް އަޅާނެ ކަމަށާއި ދިވެހި ފުލުހުން ފަށާފައިވާ ތަހުގީގަށް ކުންފުނީގެ ފަރާތުން ދޭންޖެހޭ އެއްބާރުލުން ދޭނެ ކަމަށެވެ.
މައުލޫމާތު ލިބޭ ގޮތުގައި މުވައްޒަފު އިތުރު ފަރުވާ އަށް ބެންކޮކަށް ފުރުވާލާފައިވަނީ އިއްޔެގެ ވަގުތެއްގަ އެވެ. ސްޓެލްކޯއިން އެކްސްގައި ކުރި ޕޯސްޓެއްގައި އަނިޔާ ލިބުނު މުވައްޒަފަށް އަވަސް ޝިފާއެއް ލިބި، ހެޔޮ ހާލުގައި ވަޒީފާ އަށް ނިކުމެވުމުގެ ތައުފީގު މިންވަރުކުރައްވާ ދުއާ ދަންނަވާފައިވެ އެވެ.
