ނ. އަތޮޅުން ފެށިގެން މ. އަތޮޅާ ހަމައަށް ދިވެހިރާއްޖޭގެ ގައުމީ އިދާރާ، މެޓް އޮފީހުން ހުދު ސަމާލު ނެރެފި އެވެ.
ރޭ ފަތިހު 04:45 އިން ފެށިގެން ހެނދުނު 10:30 އަށް ނެރެފައިފާ ހުދު ސަމާލުގައި މި އަތޮޅުގެ ރަށްތަކަށް ބޯކޮށް ވާރޭ ވެހުމާއެކު ގުގުރާނެ ކަމަށް މޫސުމާ ބެހޭ ގައުމީ އިދާރާއިން ލަފާކުރެ އެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ވެސް އެ އޮފީހުން ލަފާކުރެ އެވެ.
މެޓް އޮފީހުން ބުނެފައިވަނީ އުތުރާއި މެދު ރާއްޖެތެރޭގެ އެކި ހިސާބުތަކަށް ވިއްސާރަކުރުމާއެކު ގުގުރާނެ ކަމަށާއި ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށެވެ. އަދި ދެކުނުގެ ބައެއް ރަށްތަކަށް ކެރީގެ އަސަރު ފޯރާނެ ކަމަށެ ލަފާކުރެ އެވެ.
އުތުރުގެ ރަށްތަކަށް އާންމު ގޮތެއްގައި ކަނޑުތައް މަޑުވެ އެހެން ހިސާބުތަކަށް ގަދަވާނެ ކަމަށް ވެސް އެ އިދާރާ އިން ލަފާކުރާއިރު ވިލާގަނޑުގައި ހުރިހާ ސަރަހައްދަކަށް ވެސް ކަނޑުތައް ގަދަވާނެ ކަމަށް ލަފާކުރެ އެވެ.
މިއީ ރާއްޖެއަށް މޫސުން ގޯސް ދުވަސްވަރެކެވެ. މިދިޔަ ހަފްތާއިން ފެށިގެން ރާއްޖޭގެ ހުރިހާ ސަރަހައްދަކަށް ވެސް ދަނީ ވިއްސާރަކުރަމުންނެވެ. މުޅި އޭޝިއާ އަށްވެސް މޫސުން ގޯސްވެފައިވާއިރު އެންމެ ބޮޑަށް އަސަރުކޮށްފައިވަނީ ތައިލަންޑް، އިންޑަނޭޝިއާ އަދި ސްރީލަންކާ އަށެވެ. އުފެދިފައިވާ ކޮޅިގަނޑާއެކު ތައިލަންޑުން 162 މީހަކު މިހާތަނަށް މަރުވެފައިވާއިރު އިންޑަނޭޝިއާއިން 303 އަދި ލަންކާއިން 153 މީހަކު މަރުވެފައިވެ އެވެ. މި ތޫފާނުގައި އެތައް ސަތޭކަ މީހަކު ގެއްލި އެތައް ހާސް މީހެއްގެ ގެދޮރު ވެސް ވަނީ ގެއްލިފަ އެވެ.
