އިންޑޮނޭޝިއާ އަށް ކުރިމަތިވެފައިވާ ބޯ ވިއްސާރައިގެ ސަބަބުން ފެން ބޮޑުވެ ބިންގަނޑު ކަނޑައިގެން ދިޔުމުގެ ސަބަބުން 303 މީހުން މަރުވެ، 279 މީހުން ގެއްލިފައިވާ ކަމަށް ޤައުމީ ކާރިޘާ ތަކާއި ބެހޭ އިދާރާއިން ބުނެފިއެވެ.
ކަމާބެހޭ ފަރާތްތަކުން ބުނާ ގޮތުގައި ސުމަޓްރާގެ އުތުރާއި، ހުޅަނގު އަދި އަޗޭ ޕްރޮވިންސްގެ އެކި ހިސާބުތަކުން 80،000 އަށް ވުރެ ގިނަ މީހުން ގެދޮރު ގެއްލިފައިވާއިރު، ސަރުކާރުގެ ވަގުތީ ހިޔާތަކުގައި 28،400 އަށް ވުރެ ގިނަ ރައްޔިތުން އެބަތިއްބެވެ. އަދި އެތައް ހާސް ބަޔަކު އެކި ހިސާބުކުގައި ވަނީ ތާށި ވެފައެވެ.
އިންޑޮނޭޝިއާއަށް އަރާފައިވާ ޠޫފާނުގެ ސަބަބުން ގެއްލުނު މީހުން ހޯދުމުގެ މަސައްކަތް ކުރަނީ / ފޮޓޯ: ރޮއިޓާސް
ގެއްލިފައިވާ މީހުން ހޯދުމާއި ކުއްލި ހާލަތުގައި އެހީގެ ތަކެތި ފޯރުކޮށްދިނުމަށް 3،500 އަށް ވުރެ ގިނަ ފުލުހުންނާއި ވޮލެންޓިއަރުން ނުކުމެގެން އުޅޭއިރު މި ޠޫފަނުގައި އެންމެ ބޮޑަށް ގެއްލުން ލިބިފައި ވަނީ އުތުރު ސުމަޓްރާ އަށެވެ. ދެން އެންމެ ބޮޑަށް ގެއްލުން ލިބުނު ހުޅަނގު ސުމަޓްރާއިން 61 މީހުން މަރުވެ 90 މީހަކު ވަނީ ގެއްލިފައެވެ. އަޗޭ ޕްރޮވިންސުން މަދުވެގެން 35 މީހަކު މަރުވެފައިވާކަން ބައިނަލްއަޤްވާމީ މަސްދަރުތަކުން ބުނެއެވެ.
