ޖިންސީ ގޯނާގެ ބޮޑު ތުހުމަތާއެކު ރާއްޖޭގައި ހަލާލް ޓޫރިޒަމް ޕްރޮމޯޓުކުރަން މަސައްކަތް ކުރާ އަދި ފަތުރުވެރިކަމުގެ ދާއިރާގައި މަސައްކަތްކުރާ ޑރ. ހުސައިން ސަނީ އުމަރުގެ ހިއްސާ އަތުލުމަށް ޓްރެވަލް ގައިސް އިން ނިންމައިފި އެވެ.
ޓްރެވަލް ގައިސް އިން ނެރުނު ނޫސް ބަޔާނެއްގައި ބުނެފައިވަނީ އެ ކުންފުނީގައި އިސްކޮށް އުޅުއްވާ ސަނީގެ މައްޗަށް ކުރެވޭ ޖިންސީ ގޯނާގެ ތުހުމަތާއެކު އޭނާގެ ހިއްސާ އަތުލައި އެ ކުންފުނިން ވަކިކުރަން ނިންމާފައިވާ ކަމަށެވެ. އޭނާގެ ހިއްސާ އަތުލި ނަމަވެސް އެހެން ފަރާތަކަށް އެ ހިއްސާ ނުވިއްކާނެ ކަމަށާއި އެ ހިއްސާތައް ދައުރުކުރާނީ ކުންފުނި ތެރޭގައި ކަމަށް އެ ކުންފުނިން ބުނެފައިވެ އެވެ.
ސަނީ އުމަރު މަޝްހޫރުވެފައިވަނީ ރާއްޖޭގެ ޓޫރިޒަމް ޕްރޮމޯޓުކުރާ ފަރާތެއްގެ ގޮތުގަ އެވެ. އެގޮތުން އޯކާ މީޑިއާގައި ގިނަ ދުވަހު މަސައްކަތްކޮށް ރާއްޖޭން ބޭރުގެ ގިނަ ފެއާ ތަކެއްގައި ބައިވެރިވެފައިވެ އެވެ. ސަނީ އުމަރަކީ މޯލްޑިވްސް ހަލާލް ޓްރެވަލް އަދި ހަލާލް ވީކްލީގެ ފައުންޑަރު އަދި ސީއީއޯ އެވެ.
ޓްރެވަލް ގައިސްގެ ދަށުން ހިންގާ "ޓްރެވަލޫޝަން މީޑިއާ" ގައި ސަނީގެ އެއްވެސް ދައުރެއް ނެތް ކަމަށް ބުނެ އެ ކުންފުނިން ނެރުނު ބަޔާނުގައި ބުނެފައިވަނީ ޖިންސީ ގޯނާ ފަދަ އަމަލުތަކަކީ އެ ކުންފުނިން ބަލައިގަންނަ އަމަލުތަކެއް ނޫން ކަމަށާއި އެ މައްސަލަ ބެލުމުގައި ކަމާބެހޭ ފަރާތްތަކަށް އެއްބާރުލުން ދޭނެ ކަމަށެވެ.
ޖިންސީ ގޯނާގެ ތުހުމަތާއެކު ސަނީ އުމަރު ރާއްޖެ ދޫކޮށް ގޮސްފައިވާ ކަމަށް ބުނެ ސޯޝަލް މީޑިއާގައި ވަނީ އަޑުގަދަވެފަ އެވެ. އެގޮތުން އޭނާ އިންޑިއާ އަށް ފުރާފައިވާ ކަމަށާއި ފުރާފައިވަނީ ހުކުރު ދުވަހުގެ ހެނދުނު 11:40 ހާއިރު އެއާ އިންޑިއާގެ ފުލައިޓް AI2240 އިން ކަމަށް ޚުލާސާ އަށް މައުލޫމާތު ލިބެ އެވެ.
ސަނީ އުމަރަށް ކުރެވޭ ތުހުމަތުތަކާ ގުޅިގެން ފުލުހުން ބުނެފައިވަނީ އެފަދަ މައްސަލައެއްގެ ރިޕޯޓް ލިބިފައި ނުވާކަމަށާއި ނަމަވެސް އެކަން ފުލުހުންގެ ސަމާލުކަމަށް އައުމުން ބަލަންޖެހޭ ކަންކަން ބަލަމުންދާ ކަމަށެވެ.
ސަނީ އުމަރަށް ތުހުމަތު ކުރެވިފައިވަނީ އޭނާގެ އަނބިމީހާގެ އާއިލާގެ ތިން ކުއްޖަކަށް ޖިންސީ ގޯނާ ކުރިކަމުގެ ތުހުމަތެވެ. އެއީ ދެ އަންހެން ކުއްޖަކާއި ފިރިހެން ކުއްޖެކެވެ. އޭނާ ރާއްޖެއިން ބޭރަށް ފުރުވާލުމަށް ޓްރެވަލް ގައިސްގެ ތިން ފަރާތަކުން މަސައްކަތްކުރި ކަމަށްވެސް މައުލޫމާތު ލިބެ އެވެ.
