ހޮންގ ކޮންގުގެ ޓައި ޕޯގައި ހުންނަ ވޭންގް ފުކް ޓަވަރުތަކުގައި ރޯވި އަލިފާންގަނޑު މިއަދު ނިއްވާލައިފިއެވެ. އަލިފާން އެއްކޮށް ނިއްވައިލެވުނުއިރު މަރުވި މީހުންގެ ޢަދަދު ވަނީ 94 އަށް އަރާފައެވެ.

ވޭންގ ފުކް ކޯޓަކީ ހޮންގ ކޮންގގެ ސަރުކާރުން ރައްޔިތުންނަށް ދީފައިވާ ބޯހިޔާވަހިކަމުގެ އިމާރާތްތަކެކެވެ. އެ ސަރަޙައްދުގައި 32 ފަންގިފިލާގެ ޖުމްލަ އަށް ޓަވަރު ހުންނައިރު، ގާތްގަނޑަކަށް 2،000 އެޕާޓްމަންޓުގައި 4000 އާއި 7000 އާއި ދޭތެރޭގެ ޢަދަދަކަށް މީހުން ދިރިއުޅެއެވެ. އޭގެ ތެރެއިން ތިންބައި ކުޅަ އެއްބައި މީހުންނަކީ ދޮށި ޢުމުރުގެ މީހުންނެވެ.

މި ޓަވަރުތަކުގައި ރޯވި މައްސަލައިގައި ހޮންގ ކޮންގގެ ފުލުހުން ވަނީ ވޭންގ ފުކް ކޯޓުގެ ޓަވަރުތައް މަރާމާތު ކުރުމުގެ މަސައްކަތް ކުރަމުންދިޔަ ކުންފުނީގެ ދެ ޑިރެކްޓަރުންނާއި އިންޖިނިއަރިންގ ކޮންސަލްޓަންޓް ވެސް ހައްޔަރުކޮށްފައެވެ.

.ފުލުހުން ބުނީ އަލިފާންގަނޑު ރޯވެ ކޮންޓްރޯލް ނުކުރެވޭ ވަރަށް ފެތުރުމުގައި މަރާމާތުގެ މަސައްކަތް ކުރަމުންދިޔަ ކުންފުނީގެ އިހުމާލު ވަރަށް ބޮޑަށް އޮތް ކަމަށް ބެލެވޭ ކަމަށެވެ. އެ ގޮތުން އިމާރާތްތަކުގެ މަރާމާތަށް އެ ޓަވަރުތަކުގެ ބޭރުގައި ޖަހާފައިވާ ދަލާއި ބޭނުންކޮށްފައިވާ އެހެން ސާމާނަކީ ޤަވާއިދުގައިވާ ގޮތުގެ މަތިން އަލިފާން ނުހިފާ ފަދަ ތަކެތި ކަމަށް ނުބެލެވޭ ކަމަށް ފުލުހުން ވަނީ ބުނެފައެވެ. އެ ކަން ތަހުޤީޤުކުރަމުންދާ ކަމަށް އިދާރާތަކުން ވަނީ ބުނެފައެވެ.

މި އަލިފާނުގެ ހާދިޘާއަކީ 1962ވަނަ އަހަރުން ފެށިގެން ހޮންގ ކޮންގުގައި ހިނގާފައިވާ އެންމެ ގިނަ ޢަދަދެއްގެ މީހުން މަރުވި އަލިފާނުގެ ހާދިޘާއެވެ. ހޮންގ ކޮންގުގައި ހިނގާފައިވާ އަލިފާނުގެ ހާދިޘާއަކުގެ ތެރެއިން އެންމެ ގިނަ ޢަދަދެއްގެ މީހުން މަރުވެފައި ވަނީ 1918ވަނަ އަހަރު ހިނގި އަލިފާނުގެ ހާދިޘާއެއްގައެވެ. އެ ހާދިޘާގައި 600އަށް ވުރެ ގިނަ މީހުން މަރުވެފައިވެއެވެ.