ތިން ކެފޭއެއް ބަލައިފާސްކޮށް ހަތް ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފި އެވެ.
މިކަމާ ގުޅިގެން އިމިގްރޭޝަނުން އެކްސްގައި ހިއްސާކުރި ޕޯސްޓެއްގައި ބުނީ، މި ހަތް މީހުން އިމިގްރޭޝަނުގެ ބެލުމުގެ ދަށަށް ގެންދިޔައީ ބުރާސްފަތި ދުވަހު ކަމަށެވެ. އެ ހަތް މީހުންނަކީ އެ ތަނުގައި ގަވާއިދާ ހިލާފަށް އުޅެމުން ދިޔަ ބައެއް ކަމަށް އިމިގްރޭޝަނުން ވަނީ ބުނެފަ އެވެ.
ގަވާއިދާ ހިލާފަށް ރާއްޖޭގައި ދިރިއުޅޭ ބިދޭސީންގެ މައްސަލަ ހައްލު ކުރުމަކީ ރައީސް ޑރ. މުއިއްޒުގެ ވައުދުފުޅެކެވެ. އެފަދަ ބިދޭސީން ޑީޕޯޓުކުރުމުގެ މަސައްކަތް ސަރުކާރުން ފަށާފައިވާއިރު ބަޔޯމެޓްރިކްސް ނުދޭ ބިދޭސީން އަނބުރާ އެމީހުންގެ ގައުމަށް ފޮނުވާލާނެކަމަށްވެސް ރައީސް ޑރ. މުއިއްޒު ވަނީ މި މަހުގެ 14 ވަނަ ދުވަހު އިއުލާންކުރައްވައިފަ އެވެ.
ގަވާއިދާ ހިލާފަށް ރާއްޖޭގައި ދިރިއުޅޭ ބިދޭސީންގެ މައްސަލައަށް މި ސަރުކާރުގެ ފުރުތަމަ ތިން އަހަރުގެ ތެރޭގައި ދާއިމީ ހައްލެއް ހޯދުމަށް އަމާޒު ހިފާފައިވާއިރު އިމިގްރޭޝަނުން ވަނީ "އޮޕަރޭޝަން ކުރަނގި"ގެ ނަމުގައި ގަވާއިދާ ހިލާފަށް ރާއްޖޭގައި ދިރިއުޅޭ ބިދޭސީން ޑީޕޯޓުކުރުމަށް ނިމިދިޔަ އަހަރުގެ ތެރޭގައި ހާއްސަ އޮޕަރޭޝަނެއްވެސް ފަށައިފަ އެވެ.
