ކުރިއަށް އޮތް ލޯކަލް ކައުންސިލް އިންތިހާބުގައި މާލޭގެ މޭޔަރު ކަމަށް އެމްޑީޕީގެ ޕްރައިމަރީ ކެމްޕެއިން އަލީ އާޒިމް ރަސްމީކޮށް ފަށައިފި އެވެ. އޭނާގެ ކެމްޕެއިން ފެށުމަށްޓަކައި އާޓިފިޝަލް ބީޗުގައި ބުރާސްފަތި ދުވަހުގެ ރޭ ވަނީ ޖަލްސާއެއް ބާއްވާފަ އެވެ.
މެދު ހެންވޭރު ދާއިރާގެ މެންބަރުކަން ތިން ފަހަރެއްގެ މަތިން ކުރެއްވި އަލީ އާޒިމް ގެ ކެމްޕެއިން ލޯންޗިން ޖަލްސާއަށް އެމްޑީޕީ ދޫކޮށް ޑިމޮކްރަޓްސް އަށް ދިޔަ، އަދި ފަހުން އެމްޑީޕީއާ ގުޅުނު މުހައްމަދު ނަޝީދު (އަންނި) ފަޅީގެ ބައެއް މެންބަރުން މި ޖަލްސާގައި ބައިވެރިވެފައިވާއިރު ނިމިދިޔަ ސަރުކާރުގައި ފިނޭންސް މިނިސްޓަރުކަން ކުރެއްވި އިބްރާހިމް އަމީރު ވެސް މި ޖަލްސާގައި ބައިވެރިވެފައިވެ އެވެ. އަމީރު އާއި އިބްރާހިމް ސޯލިހު ފެކްޝަނާ ހިޔާލު ތަފާތުވުންތަކެއް ހުރި ކަމަށް އަޑުތަކެއް ވަނީ މީގެ ކުރިންވެސް އަރާފަ އެވެ.
މި ޖަލްސާގައި އަންނި ބައިވެރިވެފައެއް ނުވެ އެވެ. ޚުލާސާ އަށް މައުލޫމާތު ލިބުނު ގޮތުގައި ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒް އިސްމާއިލް ވެސް ހުންނެވީ އަލީ އާޒިމް ފަޅީގަ އެވެ. ނަމަވެސް ރޭގެ އިވެންޓުގައި ފައްޔާޒް ވެސް ބައިވެރިވެފައެއް ނުވެ އެވެ. އަދި މީގެ އިތުރުން އަންނިގެ އެންމެ ވަފާތެރި 19 ވަނަ މަޖިލީހުގެ ނައިބު ރައީސްކަން ކޮށްފައިވާ އީވާ އަބްދުﷲ ވެސް ރޭގެ ޖަލްސާ އަކުން ނުފެނެ އެވެ. ސަރުކާރު ބަދަލުވިފަހުން އެކަމަނާ އަދި ހުންނަވަނީ ވަރަށް "ސައިލަންޓް" ކޮށެވެ. އެމްޑީޕީ ދެކެ ފޫހިވީ ކަމަށް ވުން އެކަށީގެންވެ އެވެ.
ރޭގަ ޖަލްސާއަށް 150 ވަރަކަށް މީހުން ބައިވެރިވެފައިވާއިރު އަލީ އާޒިމް ވަނީ މިހާރުގެ މޭޔަރު އާދަމް އާޒިމަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން، ދެ ތިން ކާނުގަނޑު ސާފުކުރުމާއި ގަހެއް އިންދާލުމާއި ގަބުރުސްތާނު ކޮނުމަކީ މާލެ ރައްޔިތުންނަށް ހައްގު މިންވަރު ނޫން ކަމަށް އޭނާ ވަނީ ވިދާޅުވެފަ އެވެ.
"މާލޭގެ މީހުންނަށް ހައްގު މިންވަރަކީ ދެތިން ކާނު ސާފުކޮށްލުމާއި، މި ތަނުގައި ގަހެއް ޖަހާލުމާއި، ތިނެއް ނޮވެމްބަރުގައި ޝަހީދުވި ބައެއް ޝަހީދުން އެތަނެއްގައި ވަޅުލާފައިވަނިކޮށް ގެންގޮސް ތަނަކަށް އުކާލުމާއި؛ ތީގެ ތެރެއިން ބައެއް ބޭފުޅުންގެ މަންމާއިން ބައްޕާއިން ބޭބެއިން ފަހަރުގައި ދަރިން ބޮޑުބޭބެއިން އެމީހުން ގެންގޮސް ތަނަކަށް އުކާލާފައި އެތަނުގައި އަޅުގަނޑުމެން ކައިރީގައި ބުނަނީ ގޮސް ކުޅެލަ މަޖާކޮށްލާ ހީލާ އެތާ ފުޓްބޯޅަ ކުޅެލާ... އެއީ މާލެ މީހުންނަށް ހައްގު މިންވަރު ކަމުގައި ބުނެދޭން ބަޔަކު މަސައްކަތް ފެށީމާ އަޅުގަނޑުމެން އެބަ ނިކުންނަން ޖެހޭ." އާޒިމް ވިދާޅުވި އެވެ.
އަލީ އާޒިމްގެ ކެމްޕެއިން ފަށާފައިވާއިރު އާދަމް އާޒިމްގެ ކެމްޕެއިންވެސް ވަރަށް ފުޅާ ދާއިރާއެއްގައި އެކްޓިވިސްޓުން ދަނީ ސޯޝަލް މީޑީއާގައި ކުރަމުންނެވެ. މި ކެމްޕެއިންތަކޔގެ ފަހަތުގައި މިވަނީ އަނެއްކާވެސް އަންނި އާއި އިބޫގެ ކުރިމަތިލުން ނުވަތަ ފައްޔާޒު އާއި އިބޫގެ ކުރިމަތިލުމެވެ. 2028 ގައި އޮންނަ ރިޔާސީ އިންތިހާބަށް އެމްޑީޕީގެ ތެރޭގައި އެންމެ މަގުބޫލު ފަޅިއަކީ ކޮން ފަޅިއެއްކަން މި އިންތިހާބުން ސާފުވެގެންދާނެ ކަމަށް ބައެއް ފަރާތްތަކުން ދަނީ ބުނަމުންނެވެ.
