މޯލްޑިވްސް 2.0 ސިޔާސަތުގެ ދަށުން އިމިގްރޭޝަނުގެ ހުރިހާ ހިދުމަތެއް ޑިޖިޓަލައިޒް ކުރުމުން މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއެންއޭސީއައި) އިން ރައީސް ޑރ. މުޢިއްޒަށް ޝުކުރު އަދާކޮށްފި އެވެ.
އެމްއެންއޭސީއައި އިން ނެރުނު ނޫސް ބަޔާނެއްގައި ބުނެފައިވަނީ ރައީސުލްޖުމްހޫރިއްޔާ ޑރ. މުޢިއްޒު ހާއްސަ އިސްކަމެއް ދެއްވާ "މޯލްޑިވްސް 2.0" ގައުމީ ސިޔާސަތުގެ ދަށުން އިމިގްރޭޝަނުގެ ހުރިހާ ހިދުމަތެއް ޑިޖިޓަލައިޒް ކުރުމާއެކު އީ-ވިސާގެ ހިދުމަތްތައް ތައާރަފް ކުރުމާއި، ބިދޭސީ މަސައްކަތްތެރިންގެ މައުލޫމާތު ދެނެގަނެވޭނެ އެޕްލިކޭޝަނެއް ލޯންޗު ކުރުމަކީ އެ ދާއިރާގެ މަސައްކަތްތަކަށާއި، ހިންގުމުގެ ދާއިރާއާއި، ކުންފުނިތަކުގައި މަސައްކަތްކުރާ ބިދޭސީންގެ ކަންކަން ބެލެހެއްޓުމަށް ލިބުނު ވަރަށް ބޮޑު ފަސޭހައެއް ކަމަށެވެ.
މިފަދަ ހިދުމަތެއް ޑިޖިޓަލައިޒް ކުރެވުމަކީ ދިވެހިރާއްޖެ ކަހަލަ ޖަޒީރާ ގައުމަކަށް ނުހަނު ބޭނުންތެރި އަދި ކޮންމެހެން ބޭނުންވެފައިވާ ހިދުމަތެއް ކަމަށް އެ އެސޯސިއޭޝަނުން ފާހަގަކޮށްފައިވެ އެވެ.
ބިދޭސީ މަސައްކަތްތެރިންގެ ކަންކަން ހަރުދަނާކޮށް ބެލެހެއްޓުމަށްޓަކައި ހޯމް މިނިސްޓަރު އަލީ އިހުސާނާއި ކޮންޓްރޯލާ އޮފް އިމިގްރޭޝަން އަހްމަދު ފަސީހާއި އެ އޮފީހުގެ މުވައްޒަފުން ކުރައްވަމުން ގެންދަވާ މަސައްކަތްތައް ފާހަގަކުރަނީ އެ މަސައްކަތުގައި ދިވެހި ކޮންސްޓްރަކްޝަން އިންޑަސްޓްރީގެ ފުރިހަމަ ބައިވެރިވުމާއި އެއްބާރުލުން ދިނުމުގެ ޔަގީންކަމާ އެކުގައި ކަމަށް އެ އެސޯސިއޭޝަނުން ނެރުނު ބަޔާނުގައި ބުނެފައިވެ އެވެ.
އަދި އިމިގްރޭޝަނުގެ މަސައްކަތްތައް ޑިޖިޓަލައިޒް ކުރުމާއެކު ކޮންސްޓްރަކްޝަން ދާއިރާ އަށް ކުރިމަތިވެފައިވާ ބިދޭސީންގެ މައްސަލަތައް ހައްލުކުރުމަށް ފަސޭހަވެ އޭގެ ހެޔޮ އަސަރު ކުރާނެ ކަމަށް އެ ބަޔާނުގައި ވެއެވެ.
އިމިގްރޭޗަނުގެ ހުރިހާ ހިދުމަތެއް ޑިޖިޓަލައިޒްކޮށް އީ-ވިސާ އާއި އިމިގްރޭޝަނުގެ އޮންލައިން އެޕްލިކޭޝަން ތައާރަފްކޮށްފައިވަނީ އެކަމަށް ބޭއްވި ހާއްސަ ރަސްމިއްޔާތެއްގައި އިއްޔެގެ ވަގުތެއްގަ އެވެ.
