ބިދޭސީންގެ މައްސަލަ ހައްލުކުރުމަށް މޯލްޑިވްސް އިމިގްރޭޝަނުން ކުރިއަށް ގެންދިޔަ އޮޕަރޭޝަނެއްގައި މާލޭގެ އަށް ކެފޭއެއް ބަލައިފާސްކޮށް ގަވާޢިދާ ހިލާފަށް އުޅެމުންދިޔަ ފަސް ބިދޭސީއަކު ހައްޔަރުކޮށްފި އެވެ.
މިކަމާ ގުޅިގެން އިމިގްރޭޝަނުން އެކްސްގައި ހިއްސާކުރި ޕޯސްޓެއްގައި ބުނީ، ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅެމުން އަންނަ ބިދޭސީންނަށް އަމާޒުކޮށް ޓާސްކް ފޯސްއިން މާލޭގައި ހުންނަ އަށް ކެފޭއެއް ބަލައި ފާސްކޮށްފައިވާ ކަމަށެވެ. މި އޮޕަރޭޝަނުގައި ފަސް ބިދޭސީން އިމިގްރޭޝަނުގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ވަނީ ބުނެފަ އެވެ.
Advertisement
ގަވާއިދާ ހިލާފަށް ރާއްޖޭގައި ދިރިއުޅޭ ބިދޭސީންގެ މައްސަލަ ހައްލުކުރުމުގެ ގޮތުން އިމިގްރޭޝަނުން ފަށާފައިވާ މަސައްކަތުގެ ދަށުން އެންމެ ފާހަގަކޮށްލެވެނީ ބިދޭސީންގެ އަދަދާއި އެ މީހުންގެ މައުލޫމާތު އެއްކުރުމަށްޓަކައި އެ މީހުންގެ ބަޔޯމެޓްރިކް ޑޭޓާ ނެގުމަށްޓަކައި ކުރަމުންގެންދާ މަސައްކަތެވެ.
ގަވާއިދާހިލާފަށް ރާއްޖޭގައި ދިރިއުޅޭ ބިދޭސީން ހޯދުމުގެ މި އޮޕަރޭޝަން އިމިގްރޭޝަނުން ފަށާފައިވަނީ ނިމިދިޔަ 2024 ވަނަ އަހަރުގެ މެއި މަހުގެ ތިންވަނަ ދުވަހު އެވެ. މި އޮޕަރޭޝަނަކީ ހޯމް މިނިސްޓްރީއާއި ފުލުހުންގެ އިތުރުން އިމިގްރޭޝަނުން ގުޅިގެން ކުރިއަށް ގެންދާ އޮޕަރޭޝަނެކެވެ.
ސަރުކާރުގެ އަމާޒަކީ، ގަވައިދާ ހިލާފަށް އުޅޭ ބިދޭސީންގެ މައްސަލަ ދައުރުގެ ފުރަތަމަ ތިން އަހަރު ތެރޭގައި ހައްލުކުރުމެވެ.
