ފަސް ޓްރިލިއަން ޑޮލަރާއެކު ދުނިޔޭގެ އެންމެ އަގު ބޮޑު ކުންފުނީގެ މަގާމު ދެވަނަ ފަހަރަށް އެމެރިކާގެ އެންވީޑިއާ ހޯދައިފި އެވެ. މާކެޓް ވެލިއު އެންމެ ފުރަތަމަ ފަސް ޓްރިލިއަން ޑޮލަރަށް މިހާތަނަށް އެރި ހަމައެކަނި ކުންފުންޏަކީ ވެސް އެންވީޑިއާ އެވެ.

މިދިޔަ އަހަރުވެސް އެންވީޑިއާ ވަނީ އެޕަލް ފަހަތަށް ޖައްސާލައި އެންމެ އަގުބޮޑު ކުންފުނީގެ މަގާމު ހޯދައިފަ އެވެ. މިހާ ބޮޑު ކުރިއެރުމެއް މިހާ އަވަސް މިނެއްގައި އެ ކުންފުންޏަށް ހޯދޭ މައިގަނޑު ސަބަބަކީ އޭއައި އެޕްލިކޭޝަންތައް އިތުރުވެފައި އެ އެޕްލިކޭޝަނަށް ބޭނުންވާ ޗިޕްތަކަށް ޑިމާންޑް ބޮޑުވެފައިވާތީ އެވެ. އެންވީޑިއާގެ ގްރެފިކްސް ޕްރޮސެސިން ޔުނިޓް (ޖީޕީޔޫ) އާއި އެހެނިހެން ޗިޕްތަކަކީ ބޮޑެތި ޑޭޓާ ސެންޓަރުތަކާއި، އޭއައި ޓްރެއިނިންގ އަދި އޮޓޮނޮމިކް ވެހިކަލްތަކަށް ވަރަށް މުހިންމު ޗިޕްތަކެކެވެ. އާ އޭއައި މޮޑެލްތަކާއި ހިދުމަތްތައް ވަނީ ވަރަށް ބޮޑަށް އެންވީޑިއާގެ ހާޑްވެއާތަކަށް ބަރޯސާވެފަ އެވެ.

އެންވީޑީއާ އިން މި ކާމިޔާބުކުރި ލަނޑުދަނޑި އަކީ އިންޒާރެއް ކަމަށާއި މިފަދަ ބޮޑު ވެލިއުއޭޝަނެއް ލިބުމަކީ ރިސްކެއް ކަމަށް ބައެއް އިކޮނޮމިސްޓުންނާއި އެނަލިސްޓުން ދަނީ ބުނަމުންނެވެ. ސަޕްލައި ޗެއިންގެ މައްސަލަތަކާއި، އެކްސްޕޯޓް ރިސްޓްރިކްޝަންތަކާއި، ވާދަވެރިކަމާއި، އޭއައިގެ ކުރިއެރުން މި ސްޕީޑުގައި ކުރިއަށް ގެންދެވޭނެ ކަމުގެ ކަންބޮޑުވުންތައް ހުރި ކަމަށް އެ ފަރާތްތަކުން ދަނީ ފާހަގަކުރަމުންނެވެ.

އެންވީޑިއާ މަޝްހޫރުވުމުގެ ކުރިން އެޕަލް އާއި މައިކްރޮސޮފްޓަކީ ދުނިޔޭގެ އެންމެ އަގުބޮޑު ދެ ކުންފުންޏެވެ. 2023 ވަނަ އަހަރު އެޕަލްގެ މާކެޓް ވެލިއުއޭޝަން ތިން ޓްރިލިއަން ޑޮލަރަށް ވުރެ މައްޗަށް ވަނީ އަރާފަ އެވެ. ނަމަވެސް 2024 ވަނަ އަހަރު އެންވީޑިއާ އިން ވަނީ އެޕަލް އާއި މައިކްރޮސޮފްޓް ފަހަތަށް ޖައްސާލައި 3.3 ޓްރިލިއަން ޑޮލަރަށް އަރާފަ އެވެ.

މިވަގުތު ދުނިޔޭގެ އެންމެ އަގުބޮޑު ކުންފުނިތަކުގެ ލިސްޓު؛

1. އެންވީޑިއާ (5.1 ޓްރިލިއަން ޑޮލަރު)
2. އެޕަލް (4 ޓްރިލިއަން ޑޮލަރު)
3. މައިކްރޯސޮފްޓް (4 ޓްރިލިއަން ޑޮލަރު)
4. އަލްފަބެޓް (3.3 ޓްރިލިއަން ޑޮލަރު)
5. އެމެޒަން (2.4 ޓްރިލިއަން ޑޮލަރު)
6. މެޓާ (1.9 ޓްރިލިއަން ޑޮލަރު)
7. ބްރޯޑްކޮމް (1.8 ޓްރިލިއަން ޑޮލަރު)
8. އެރަމްކޯ (1.7 ޓްރިލިއަން ޑޮލަރު)
9. ޓެސްލާ (1.5 ޓްރިލިއަން ޑޮލަރު)
10. ޓީއެސްއެމްސީ (1.3 ޓްރިލިއަން ޑޮލަރު)

އޯޕަން އޭއައި، ގޫގުލް އަދި މެޓާ ފަދަ ކުންފުނިތަކަށް ލެންގުއޭޖް މޮޑެލްތައް ޑިވެލޮޕްކޮށް ތަމްރީނު ކުރުމަށް އެޑްވާންސް ހާޑްވެއާތައް ބޭނުންވެ އެވެ. އެންވީޑިއާ އިން މި ހައި-ޕާފޯމަންސް ޗިޕްތައް ސަޕްލައިކޮށްދޭއިރު، ހާއްސަކޮށް އެ ކުންފުނިން ފޯރުކޮށްދޭ އެޗް100 އަދި އޭ100 އަކީ ކޮމްޕްލެކްސް އޭއައި އެޕްލިކޭޝަންތައް އެކްސެކިއުޓް ކުރުމަށް ވަރަށް މުހިންމު ޗިޕްތަކެކެވެ.