ދުނިޔޭގެ ފުޓްބޯޅައިގެ މައި އިދާރާ، ފީފާގެ ރައީސް ޖިއާނީ އިންފަންޓީނޯ މިއަދު ރާއްޖެ ވައިޑައިގެންފި އެވެ.
ގަތަރު އެއާވޭޒްގެ ޕްރައިޓް ޖެޓެއްގައި ސްވިޒަލެންޑުގެ ޒިއުރިކުން ސީދާ ރާއްޖެ ވަޑައިގެންނެވި އިންފަންޓީނޯ އަށް ވެލާނާ އިންޓަނޭޝަނަލް އެއާޕޯޓުން މަރުހަބާ ދެންނެވީ ޓޫރިޒަމް މިނިސްޓަރު ތާރިގް އިބްރާހިމް އާއި ފުޓުބޯޅަ އެސޯސިއޭޝަން އޮފް މޯލްޑިވިސްގެ ރައީސް އަހުމަދު ތާރިގް (ޓޮމް) އާއި ފީފާގެ ރީޖަނަލް އޮފީސްގެ ހެޑް ޕްރިންސް ރޫފަސްގެ އިތުރުން ސްޕޯޓްސް ކޮމިޝަނަރު މުހައްމަދު ތޮލާލް އެވެ.
ވެލާނާ އިންޓަނޭޝަނަލް އެއާޕޯޓުން އިންފަންޓީނޯ އަށް މަރުހަބާ ދެންނެވުމުގެ ގޮތުން ސަގާފީ އައިޓަމްތަކެވެސް ވަނީ ހުށަހަޅާދީފަ އެވެ. އެއާޕޯޓުގެ ވީއައިޕީ ލޯންޖު ކުރިމަތީގައި ބޭއްވި މި ހަރަކާތްތަކުގައި އެފްއޭއެމްގެ އެކްސްކޯ މެމްބަރުންނާއި، ކްލަބްތަކުގެ އިސްވެރިންނާއި، ގައުމީ ޓީމުގެ ކުޅުންތެރިންނާ އެކު އިންފަންޓީނޯ އެތަނަށް ނުކުތުމުން ރާއްޖޭގެ އެކަޑަމީތަކުގެ ކުޅުންތެރިންވެސް އިންފަންޓީނޯ އަށް މަރުހަބާ ދެންނެވުމުގައި ބައިވެރިވި އެވެ.
ފީފާގެ ރައީސް ޖިއާނީ އިންފަންޓީނޯއަށް މަރުހަބާ ދެންނެވުމަށް ވީައިއޭގައި ކުރިއަށްގެންދިޔަ ހަރަކާތުގެ ތެރެއިން---ފޮޓޯ:އެފްއޭއެމް
އިންފަންޓީނޯގެ މި ދަތުރުފުޅަކީ އެފްއޭއެމްގެ ރައީސް ތާރިގް (ޓޮމް)ގެ ދައުވަތަކަށް ކުރައްވާ އެއްދުވަހު ދަތުރުފުޅެކެވެ. މި ދަތުރުފުޅުގެ މި ދަތުރުގައި އެންމެ މުހިއްމު ކަމަކަށް އޮތީ، މިއަދު ރައީސް އޮފީހުގައި، ރައީސް ޑރ. މުހައްމަދު މުއިއްޒުއާ އެކު އިންފަންޓީނޯ ބާއްވަވާ ބައްދަލުކުރެއްވުމެވެ. މި މަޝްވަރާގައި ދެ ބޭފުޅުން، ރާއްޖޭގެ ފުޓްބޯޅަ ކުރިއެރުވޭނެ ގޮތްތަކާ ބެހޭގޮތުން ވާހަކަދައްކަވާނެ އެވެ.
މިއީ މިދިޔަ 19 އަހަރުތެރޭގައި ފީފާގެ ރައީސަކު ރާއްޖެ ވަޑައިގަތް ފުރަތަމަ ފަހަރެވެ. މި ޒިޔާރަތުގައި އިންފަންޓީނޯ ރާއްޖޭގެ ކުލަބުތަކުގެ ވެރިންނާވެސް ބައްދަލުކުރައްވާނެއެވެ. އިންފަންޓީނޯގެ މި ދަތުރުފުޅު ވެގެންދާނީ ރާއްޖޭގެ ފުޓުބޯޅައަށް އަލުން ދިރުން ގެނެސް ފުޓްބޯޅަ ކުރިއެރުވުމަށް އެފްއޭއެމުން ކުރާ މަސައްކަތަށް ލިބިގެންދާނެ އިތުރު ހިއްވަރަކަށެވެ. އަދި ރާއްޖޭގެ ފުޓްބޯޅައަށް އަލުން ރޫހު ގެނެސް އެފްއޭއެމްގެ ހިންގުން ހަރުދަނާވެ ކުލަބުތަކުގެ މާލީ ނިޒާމާއި ކުޅުންތެރިންނަށް ލިބެންޖެހޭ ހައްގުތައް އަލުން ހޯދައިދީ ފުޓުބޯޅައިގެ ތެރޭގައި ހުނަރުވެރި ކުޅުންތެރިން ހިފެހެއްޓުމަށް ކުރާ މަސައްކަތަށްވެސް އިތުރު ބާރަކަށެވެ. 
ފީފާގެ ރައީސް ޖިއާނީ އިންފަންޓީނޯއަށް މަރުހަބާ ދެންނެވުމަށް ވީައިއޭގައި ކުރިއަށްގެންދިޔަ ހަރަކާތުގެ ތެރެއިން---ފޮޓޯ:އެފްއޭއެމް
އިންފަންޓީނޯގެ ދަތުރުފުޅާ ގުޅިގެން ބާއްވާ ހާއްސަ ހަރަކާތްތަކުގެ ތެރެއިން މިއަދު ހަވީރު ގަލޮޅު ދަނޑުގައި ފުޓްބޯޅަ އެގްޒިބިޝަނެއް ބާއްވަން ވަނީ ރާވައިފަ އެވެ. މި އެގްޒިބިޝަނުގައި ރައީސް ޑރ. މުއިއްޒުގެ ޓީމަކާއި، އިންފަންޓީނޯގެ ޓީމަކުން މެޗެއް ވެސް ކުޅޭނެ އެވެ. އިންފަންޓީނޯގެ ޓީމުގައި އޭނާގެ އިތުރުން އިޓަލީގެ ވޯލްޑް ކަޕް ތަރި މާކޯ މަޓެރާޒީ އާއި އެފްއޭއެމްގެ ރައީސް ޓޮމް އާއި ރާއްޖޭގެ ގައުމީ ޓީމުގެ ކުރީގެ ބައެއް ކުޅުންތެރިން ހިމެނެ އެވެ.
