އެކުވެރި ބަންގްލަދޭޝް، ޑާކާގެ މައި ވައިގެ ބަނދަރުގައި އަލިފާނުގެ ހާދިސާއެއް ހިނގައި ފްލައިޓް ޝެޑިއުލަށް ބުރޫ އަރައިފި އެވެ.
ހަޒްރަތު ޝާހުޖަލާލް އިންޓަރނޭޝަނަލް އެއާޕޯޓުގެ ކާގޯ ޓާމިނަލުގައި ހިނގި މި އަލިފާނުގެ ހާދިސާގައި އެއްވެސް މީހަކަށް ގެއްލުމެއް ލިބިފައި ނުވެ އެވެ. އެ ގައުމުގެ ގަޑިން ހޮނިހިރު ދުވަހު މެންދުރު 14:00 ހާއިރު ރޯވި މި ބޮޑު އަލިފާނުގެ ހާދިސާގެ ސަބަބުން ހަ ގަޑިއިރަށް ފްލައިޓްތައް ޖައްސާ ފުރުން ހުއްޓިފައިވާ ކަމަށާއި، ފްލައިޓް އޮޕަރޭޝަންސް އަލުން ފަށާފައިވަނީ ރޭގަނޑު 21:00 ހާއިރު ކަމަށް އެ ގައުމުގެ ސިވިލް އޭވިއޭޝަން އޮތޯރިޓީން ބުނެފައިވެ އެވެ.
އަލިފާން ރޯވާން މެދުވެރިވި ސަބަބު އަދި ދެނެގަނެވިފައި ނުވާއިރު އެ ހާދިސާގެ ސަބަބުން ތަކެއްޗަށް ވީ ގެއްލުމުގެ އަގު ބުނަން ދަތި ކަމަށް އޮފިޝަލުން ބުނެފައިވެ އެވެ. ނަމަވެސް ބައެއް މަސްދަރުތަކުން ބުނާ ގޮތުގައި މި ހާދިސާގެ ސަބަބުން ލިބުނު ގެއްލުމުގެ އަދަދު 1.5 ބިލިއަން ޑޮލަރަށް އަރާނެ އެވެ.
މިއީ މިފަދަ ހާދިސާ އެއް އެ ގައުމުގައި މި ހަފްތާގައި ހިނގި ތިން ވަނަ ފަހަރެވެ. މި މަހު 13 ވަނަ ދުވަހު ހެދުން އުފައްދާ ކާރުހާނާއެއްގައި ރޯވެ ޖެހިގެން ހުރި ކެމިލަކް ގުދަނެއްގައި ރޯވެ 16 މީހުން ވަނީ މަރުވެފަ އެވެ. އަދި މި މަހުގެ 16 ވަނަ ދުވަހު ވެސް ވަނީ ހެދުން އުފައްދާ ކާރުހާނާއެއްގައި ރޯވެފަ އެވެ. ބަންގްލަދޭޝްގެ ވަގުތީ ސަރުކާރުން ބުނެފައިވަނީ މި ހުރިހާ ހާދިސާއެއް ވެސް ތަހުގީގު ކުރާނެ ކަމަށާއި، ގަސްތުގައި މިފަދަ އަމަލެއް އެއްވެސް ފަރާތަކުން ހިންގާފައިވާ ކަމަށް ތަހުގީގުން އެނގިއްޖެ ނަމަ އެންމެ ހަރުކަށި ފިޔަވަޅު އަޅާނެ ކަމަށެވެ.
