ކުލަބް މޯލްޑިވްސް ކަޕުގެ ކުއާޓަރ ފައިނަލުގައި މުބާރާތުގެ ފެވަރިޓެއްގެ ގޮތުގައި ބެލެވުނު ސްޓެލްކޯ 2-3 ގެ ނަތީޖާ އިން ބަލިކުރުމަށްފަހު މޯލްޑިވިއަން ސެމީ ފައިނަލަށް ދަތުރު ކޮށްފި އެވެ.

މި މެޗުގައި ސްޓެލްކޯގެ ފަރާތުން މޮޅު ކުޅުމެއް ފެނިގެންދިޔަ ނަމަވެސް މޯލްޑިވިއަން އިން މެޗު ކާމިޔާބުކޮށްފައިވަނީ ކައުންޓަރ އެޓޭކުގެ ބޭނުން ހިފައިގެންކަން ފާހަގަކޮށްލެވެ އެވެ.

ފުރަތަމަ ހާފު ނިމިގެން ދިޔައިރު ދެ ޓީމުންކުރެ ޓީމަކަށް ގޯލެއް ޖެހިފައެއް ނުވެ އެވެ. ސްޓެލްކޯގެ ގޯލު ދެވަނަ ހާފުގައި ފޫއަޅުވާލާފައި ވަނީ އިސްމާއިލް ނަދާދު އެވެ. އޭގެ ދެ މިނެޓު ފަހުން ސްޓެލްކޯގެ ޒައިދާން ސްޓެލްކޯ އަށް މެޗު އެއްވަރުކޮށްދިން ނަމަވެސް އޭގެ މިނެޓެއް ފަހުން މޯލްޑިވިއަންގެ ދެވަނަ ގޯލު އިސްމާއިލް އަހްމަދު ވަނީ ކާމިޔާބުކޮށްފަ އެވެ. އަދި އޭގެ ހަތަރު މިނެޓު ފަހުން އިސްމާއިލް އަހްމަދު ވަނީ އޭނާގެ ދެވަނަ ގޯލު ޖަހާފަ އެވެ. ސްޓެލްކޯގެ ދެ ވަނަ ގޯލު ފަހު މިނެޓުގައި ޖެހީ ނާއިހް މުފީދެވެ.

މި މެޗުގެ މޮޅު ކުޅުންތެރިޔާގެ މަގާމު ހޯދާފައިވަނީ މުހިންމު ގިނަ ސޭވްތަކެއް ކޮށްފައިވާ މޯލްޑިވިއަންގެ ކީޕަރު އަބްދުއްސަދާދު އާދަމަށެވެ.

ތަށި އުފުލާލުމުގެ އުންމީދުގައި އޮތް ސްޓެލްކޯއަށް މިއީ ހިތްދަތި ނަތީޖާ އެކެވެ. ސެމީ ފައިނަލުގައި މޯލްޑިވިއަން ވާދަކުރަން ޖެހޭނީ މިހާރު ކުޅެމުންދާ އެމްއޭސީއެލް-އާރުޑީސީ މެޗުން މޮޅުވާ ބަޔަކާ ދެކޮޅަށެވެ. ސެމީ ފައިނަލް އޮންނާނީ މި އަންނަ ހޯމަ ދުވަހުގެ ރޭ ގައެވެ.