ދިވެހިރާއްޖޭގެ ގައުމީ އެއާލައިނުން ޗައިނާގެ ތިން ސިޓީ ކަމަށްވާ ޝަންހާއި، ބެއިޖިންގ، އަދި ޗެންގްޑޫ އަށް ސީދާ ދަތުރުތައް ފަށަން ތައްޔާރުވެއްޖެ އެވެ.

މޯލްޑިވިއަނުން ބުނެފައިވަނީ މި ދަތުރުތައް ފަށަން ހަމަޖެހިފައިވަނީ މި އޮކްޓޫބަރު މަހުގެ 30 ވަނަ ދުވަހުން ފެށިގެން ނޮވެމްބަރު މަހުގެ 15 ވަނަ ދުވަހުގެ ނިޔަލަށް ކަމަށެވެ. އަދި ދަތުރު ކުރާ ފަރާތްތަކަށް 40 ކިލޯގެ ބެގެޖް އެލަވަންސް ލިބޭނެ ކަމަށް ގައުމީ އެއާލައިނުން ބުނެފައިވެ އެވެ.

މޯލްޑިވިއަނުން މި ތިން ސިޓީ އަށް ކުރާ ދަތުރުތަކުގެ އަގުތަކަކީ؛

ޝަންހާއި: 399 ޑޮލަރު

ބެއިޖިންގ: 399 ޑޮލަރު

ޗެންގްޑޫ: 349 ޑޮލަރު

ތައިލެންޑުގެ ބްނެގްކޮކަށް ވެސް ދަތުރުތައް ފަށަން ގައުމީ އެއާލައިނުން ދަނީ ތައްޔާރުވަމުންނެވެ. އެގޮތުން ސްކޫލް ބަނދުގައި 23 ޑިސެމްބަރުން ފެށިގެން 13 ޖެނުއަރީ އަށް، ކޮންމެ އަންގާރަ ދުވަހެއްގައި އެ އެއާލައިނުން 399 ޑޮލަރަށް ދަތުރުކޮށްލެވޭނެ އެވެ.

މި ދަތުރުތައް ގައުމީ އެއާލައިނުން ކުރާނީ މިދިޔަ އަހަރު ގެނައި އޭ 330 ނުވަތަ ކުރިން ބޭނުންކުރަމުން އަންނަ އޭ 320 މަރުކާގެ މަތިންދާބޯޓުންނެވެ. ގައުމީ އެއާލައިނުގެ ފްލީޓަށް އޭ 330 މަރުކާގެ އިތުރު ބޯޓެއް ގެނައުމަށް މިއަހަރު މާޗު މަހުގައި ވަނީ އިއުލާން ކޮށްފަ އެވެ.

ރާއްޖޭއިން ބޭރުގެ މަންޒިލްތަކުގެ ތެރޭގައި މިވަގުތު ގައުމީ އެއާލައިނުން ދަތުރު ކުރަނީ އިންޑިއާގެ ދެ މަންޒިލަކަށެވެ. އެއީ ޓްރިވަންޑްރަމަށާއި ކޮޗިން އަށެވެ.