ށ. ނޫމަރާގައި 300 މީހުންނަށް ނަމާދުކުރެވޭ ޖާގައިގެ މިސްކިތުގެ ބިންގާ މިއަދު އަޅުއްވައިފި އެވެ. މި މިސްކިތުގެ ބިންގާ އަޅުއްވާފައިވަނީ ރައީސުލްޖުމްހޫރިއްޔާ މިއަދު ށ. އަތޮޅަށް ކުރައްވަމުން ގެންދަވާ ދަތުރުފުޅުގައި ނޫމަރާ އަށް ވަޑައިގެންނެވެ.
މިކަމަށްޓަކައި ބޭއްވި ހާއްސަ ރަސްމިއްޔާތުގައި މިސްކިތުގެ ބިންގާ އަޅުއްވާދެއްވާފައިވަނީ އިސްލާމީ ކަންތައްތަކާ ބެހޭ ވުޒާރާގެ މިނިސްޓަރު ޑރ. ޝަހީމް އަލީ ސައީދެވެ. މި ރަސްމިއްޔާތުގައި ރައީސް ޑރ. މުޢއިއްޒު ގެ އިތުރުން ސަރުކާރުގެ ބައެއް އިސްވެރިން ބައިވެރިވެވަޑައިގެންފައި ވެއެވެ.
މި މިސްކިތް އިމާރާތް ކުރުމަށް ހަވާލުކޮށްފައިވަނީ ފެނަކަ ކޯޕަރޭޝަން ލިމިޓެޑާ އެވެ. މިސްކިތުގެ މަސައްކަތް ނިމިގެންދާއިރު ސޯލާ ހަރުކުރެވި، އޭސީ ހަރުކުރެވި އަދި ލައިބްރަރީ އަކާއި ކްލާސްރޫމެއް ހިމެނިގެންދާނެ އެވެ.
Advertisement
މި މަޝްރޫއުއަކީ ރައީސުލްޖުމްހޫރިއްޔާ ޑރ. މުޢިއްޒުގެ ރިޔާސީ ވައުދެކެވެ. ރާއްޖޭގެ ރަށްތަކުގައި އަލަށް އިމާރާތް ކުރާ މިސްކިތްތަކަކީ ޒަމާނީ ޑިޒައިންތަކަށް އިމާރާތް ކުރާ ހިއްގައިމު މިސްކިތްތަކެެވެ.
2023 ވަނަ އަހަރު ރާއްޖޭގެ ބޯހިމެނިއިރު ށ. ނޫމަރާގެ އާބާދީ އަކީ 371 މީހުންނެވެ. އެހެންކަމުން މިފަދަ މަޝްރޫއުއެއް އެ ރަށުގައި ފައްޓަވައިދެއްވުމުން ދޭހަވަނީ މި ސަރުކާރުން ކުޑަ ރަށެއް ބޮޑު ރަށެއް ނުބަލައި ތަރައްގީގައި ހުރިހާ ރަށެއް އެއްހަމަ ކުރާ ކަމެވެ.
ރައްޔިތުންނާ ގާތުން ބައްދަލުކުރެއްވުމުގެ ގޮތުން ރައީސުލްޖުމްހޫރިއްޔާ އަތޮޅުތަކަށް ކުރައްވާ ދަތުރުފުޅުތަކުގެ ތެރެއިން މިއަދު ވަޑައިގަތީ ށ. އަތޮޅަށެވެ. ށ. އަތޮޅުގެ މީހުން ދިރިއުޅޭ 14 ރަށަކަށް އެމަނިކުފާނު ވަޑައިގަންނަވަން ވަނީ ހަމަޖެހިފަ އެވެ.
